കവിതയുടെ മധുരം നുകരാൻ വീണ്ടും വീണ്ടും വരിക

Thursday, 17 August 2017

വൃദ്ധർ ശാപമോ

എന്തിനുവൃഥാ വ്യസനിക്കുന്നിജീവിതം
അന്ത്യമൊരുനാളില്‍ പോകണ്ടവർനാം
ബാല്യ,യവ്വന,വാർദ്ധക്യവും നമ്മേ,
തേടിയെത്തുന്നതി ലോക നീതിയത്രേ

ആരുമാകട്ടെയീ ജീവിത വീഥിയിൽ  
ആറടി മണ്ണിൻ അവകാശി നമ്മൾ
രാജാവും ദരിദ്രൻ പണ്ഡിതൻ,പാമരൻ
ജേതാവോ,സന്യാസി,ഭിക്ഷക്കാരൻ
ഈ നാടകാന്ത്യത്തിൽ വിടപറയുവാൻ
കാത്തിരിക്കുംകാല, തിരശീലപിന്നിൽ

കാല നീതിയലംഘനീയമീ ജീവിതം
കാത്തിരിക്കും വിധിതടുക്കുവാൻ
ബന്ധങ്ങളൊക്കെമറന്നു കളഞ്ഞു
വൃദ്ധസദനത്തിലാക്കിയാൽ മക്കൾ
അറ്റുപോകുമോ മാതാപിതാക്കളിൻ
രക്ത ബന്ധങ്ങളൊക്കെയും ...

ഒരുതിരശീല പിന്നിൽ ദുഃഖസാന്ദ്രമായ്
കാലം തുടരുന്നു പ്രിയരേ നാം
ഓർക്കുക വല്ലപ്പൊഴുമീ ജന്മംനൽകിയ
വൃദ്ധരാം മാതാപിതാക്കളെ
ഓർക്കുകനിങ്ങൾ നാളെ നരയുടെ ഉ -
ടകളാകുന്ന കാലം വിദൂരമല്ല ...

വെട്ടിപ്പിടിച്ചും തട്ടിപ്പറിച്ചുതൊക്കെ
നാം, ഒരുനാളിവിടിട്ടേച്ചു പോകണം
നഗ്നരായി വെറും മെയ്യാൽ വരുന്നവർ
നഗ്നരായിട്ട് തന്നെ പോകേണ്ടയോ

ഓർക്കണം വൃദ്ധരാം മാതാപിതാക്കളെ
ഓർക്കണം വൃദ്ധരാകുമെന്നൊരുസത്യം
വൃദ്ധസദനത്തിലാക്കാതെ ,
ശിഷ്ടകാലം സന്തുഷ്ടമാക്കുവാൻ മക്കളെ
നൽകണം സന്തുഷ്ടം ജീവിതം
ദേവൻ തറപ്പിൽ 

എന്റെ മരണം

എന്റെ മരണം...!
ഞാൻ മരിച്ചാൽ
എന്റെ മരണം
ആഘോഷമാക്കരുത് !
എന്റെ ജഡത്തിൽ,
ആരും പുഷ്പങ്ങൾ
വെയ്ക്കരുത് !

എന്റെ ആത്മാവിനു
വേണ്ടി മാത്രം,
ആരും പ്രാർത്ഥിക്കരുത് !
ബലിയിടുകയോ,
കർമ്മങ്ങൾചെയ്യുകയോ
റീത്ത് വയ്ക്കുകയോ
അരുത് !

എന്നെ കുളിപ്പിച്ചു
കോടിതുണികൊണ്ട്
ജഡം,
പുതപ്പിക്കരുത് !

പുതിയത് അനാഥർക്ക്
ദാനം കൊടുത്ത്,
പഴന്തുണി കഴുകി, ജഡത്തിൽ
ഇടാം... !
ഗുണമില്ലാത്ത പൂജയ്ക്ക് പകരം
അന്നദാനം നടത്തണം !

എന്റെ അവയവങ്ങൾ
ജീവിച്ചു മരിക്കുന്നവർക്ക്
ദാനം കൊടുക്കണം.!

അസ്ഥിയെടുത്ത്
കർമങ്ങൾ ചെയ്തു
പുഴയിൽ ഒഴുക്കരുത്.
പകരം ജഡം കത്തിച്ച
ചാരം വളമാക്കണം !

എനിക്ക് കല്ലറ പണിതു
ദനം വ്യയം ചെയ്യരുത്.
ജഡം മറവ് ചെയ്തടത്ത്,
ഒരു ബോഡിൽ,
ഇങ്ങനെ എഴുതണം..!

ഹൃദയ ശുദ്ധിയുള്ളവർ,
എന്റെ മണ്ണിൽ
ചവിട്ടുകയും, തുപ്പുകയും
ചെയ്യണം...
എന്തെന്നാൽ,
എന്റെ തെറ്റുകൾക്ക്
നിങ്ങളോട്
മാപ്പ് മാപ്പ് മാപ്പ്....!
*ദേവൻ തറപ്പിൽ*

Friday, 4 August 2017

കടൽ വന്നു വിളിച്ചപ്പം

കടൽവന്നു വിളിച്ചപ്പം ...!!
കടൽവന്നു വിളിച്ചപ്പം കരയോട് പറഞ്ഞല്ലൊ 
കിന്നാരം ചൊല്ലാനായ് തിരികെവരാം ഞാനിപ്പം

തിരമാലകളുയരത്തിൽ മലപോലെ വരുന്നുണ്ടേ 
തിരയോടു പറഞ്ഞിട്ട് മൊഴിചൊല്ലത്തിരികെവരാം 

മലയൊന്നു തിരഞ്ഞപ്പോൾ നരവീണൊരു തലപോലെ 
മരണത്തിൽ തോടെല്ലാം മടവീണൊരു പാടങ്ങൾ 

മലമുകളിൽ വിരുന്നൊരുക്കിയ പൂഞ്ചോല പൂപ്പന്തൽ  
കാട്ടരുവികളലറിപ്പായും വെള്ളിനിലാനീരെവിടെ 

പുലർകാലേ തുള്ളികളായ് കുളിർ കോരിപ്പെയ്യുംമ്പോൾ 
സിന്ദൂരം പൂശീയസന്ധ്യേ കതിരോന്റെ രശ്മികളുണ്ടോ 

തൂവെള്ള പതഞ്ഞൊഴുകും പാൽപുഞ്ചിരി പൂത്തുള്ള
പൂനിലാപ്പന്തൽ വിരിച്ചാ നീരുറവകൾമാഞ്ഞല്ലോ 

കളകൂജനം പാടും കിളികൾ കളഹധ്വനിയില്ലാതെ 
കതിരോന്‍റെ രശ്മികളില്ലാ,തിരുൾമൂടീ,താരകവും !
ദേവൻ തറപ്പിൽ

Wednesday, 2 August 2017

കാത്തിരിപ്പ്

🌺*കാത്തിരിപ്പ്*🌺 
ഒരുവേള പ്രിയതമേ സാന്നിധ്യമേകുകിൽ
ഒരുനൂറു സംവത്സസരങ്ങൾ കാക്കാം...

ഒരു നൂറുസ്വപ്നങ്ങൾ പേറിനീയരികത്ത് 

വരുമെങ്കിൽ ദശകങ്ങൾ പങ്കുവെയ്ക്കാം...

ഒരു പിടിയോർമ്മനാം പങ്കുവെച്ചപ്പൊള-

ന്നോരായിരം വർഷം ധന്യമായി....

തംമ്പൂരുമീട്ടിയെൻ ജീവിതനൗകയിൽ

തഴുകിത്തഴുകിക്കടന്ന കാലം ..

എല്ലാം മനോഹര സ്വപനങ്ങളിന്നെന്റെ 
ചാരത്തിൽ മൂടിയ കനലുപോലെ 

ഏറും പ്രതീക്ഷകൾ കൈവെടിയാതെഞാൻ

ഏകനായിട്ടെന്നും കാത്തിരുന്നു....

ഒന്നും പറയാതെ യാത്ര നീ പോയപ്പോൾ

കണ്ണേ മറക്കാൻ കഴിയില്ലിന്നു....

നൊമ്പരങ്ങൾപേറി യാത്ര നീ പോയതും

പമ്പരം പോലെ കറങ്ങി ഞാനും.....

അവസാനാമിയെന്റെ ശ്വാസം നിലക്കുന്ന 

നേരത്തു നീയൊന്നു വന്നുവെങ്കിൽ 

അരുകിൽ നീയൊരുവേള വന്നിട്ടു പ്രിയതമേ 

തഴുകിനീ തരുമെങ്കിൽ ധന്യമായി,

ഒരുനൂറു മാപ്പുഞാൻ ചൊല്ലിടാമവസാന-

ദിനമെന്റ വാതിൽക്കൽ കാവൽനിൽപ്പു...

മരണത്തെയാട്ടിയോടിച്ചിടാം ഞാനിപ്പോൾ

പ്രിയതമേ നീ തിരികെയെത്തുമെങ്കിൽ

ഒരുനോക്കുകണ്ടിട്ട് ശ്വാസം നിലക്കുകിൽ, 
പ്രിയതമേ ജീവിതം ധന്യമായി...
പുണ്യജീവിതം ധന്യമായി..!
ദേവൻ തറപ്പിൽ. 

Wednesday, 26 July 2017

കവി സൂരികളെ..!

കവി സൂരികളെ..!
കാവ്യങ്ങളെഴുതുമ്പോൾ 
തന്നുടെ കാവ്യമേറ്റം 
നന്നെന്നു നിരൂപിക്കു- 
മെത്രയോ രചിതാക്കൾ 

അർപ്പണ ബോധത്തോടെ 
രചിക്കാൻ കഴിഞ്ഞീടിൽ 
തന്നുടെ കവിതകൾ
എത്രയോ മനോഹരം 

വായന വേണംവേണം 
പുനർവായനയെന്നും  
എന്നിട്ടും പലവട്ടം 
കത്രിക്കു നിരന്തരം 

കാവ്യതീരം നമുക്കു 
ശില്പശാലയാക്കിടാം 
ശിൽപ്പത്തെപോലെതന്നെ 
ഭംഗിയായ് മിനുക്കിടാം  

കുറ്റവും ശിക്ഷണവും 
നൽകിടും നേരത്തെങ്ങും 
വ്യർത്ഥമാണെന്നു ചൊല്ലി 
പോകല്ലേ സൂരികളെ...! 
(ദേവൻ തറപ്പിൽ)

Wednesday, 19 July 2017

മത്സ്യംഭോഗിക്കുന്ന വെള്ളം കുടിക്കരുത്?

മത്സ്യംഭോഗിക്കുന്ന
വെള്ളം കുടിക്കരുത്?
-------
സ്ത്രീകളെ, 
അമ്പലങ്ങളിലും പള്ളികളിലും
മദ്രസകളിലും  കയറ്റരുത്, 
അശുദ്ധരും ഋതുമതികളും 
ആർത്തവരക്തം ദുഷിപ്പിച്ചു 
വമിപ്പിച്ചുപ്പിക്കുന്നവരാണ്.! 

ഭോഗിക്കുമ്പോൾ അവളുടെ
വിശുദ്ധിയും അശുദ്ധിയും
എന്തിന്,
കറുത്തതോ വെളുത്തതും
നോക്കാറില്ല. 

മൃഗവേഷം ധരിച്ചു 
മാറിമാറി ഭോഗിച്ച ദൈവത്തിനും
അശുദ്ധി..?

കിണറിലേയും കുളത്തിലേയും
നദിയിലേയും കടലിലേയും
കായലിലേയും 
വെള്ളം കുടിക്കരുത്.
മത്സ്യങ്ങൾ അതിലാണ്
നിത്യം,
ഭോഗിക്കുന്നത്..?

കുഞ്ഞുങ്ങൾ മുതൽ 
തൊണ്ണൂറു വയസുള്ള 
അമ്മുമ്മയേം ഭോഗിക്കാം,
അത്‌,അവകാശമാണ്.
തടയരുത്.. !

മൽസ്യമാംസം കഴിച്ചാൽ 
ദൈവം കോപിക്കും.
അസ്ഹഷ്ണതയുടെ
അമരത്തിരുന്നു മനുഷ്യമാംസം
വെട്ടിവിൽക്കാം . ദൈവത്തിനു
വിരോധമില്ല... !

മുട്ടയും ബദാമും പാലും 
കുടിച്ചാൽ,
അമ്മപ്പശു കോപിക്കില്ല,
പക്ഷേ ഞങ്ങൾ, 
മതവൈര്യം പ്രീണിപ്പിച്ചു 
അസഹിഷ്ണത 
വളർത്തി,
മനുഷ്യമൃഗമാകും.?
മനുഷ്യനാവാൻ
പണ്ഡിതനായാൽ 
പോരാ,
അതിന്‌,
മതേതര മുഖമുണ്ടാകണം..
മനുഷ്യത്വം ഉണ്ടാവണം.....
(ദേവൻ തറപ്പിൽ)

Tuesday, 18 July 2017

മുത്തശ്ശിക്കിണർ

(മുത്തശ്ശികിണർ)
പ്രായാധിക്യത്തിന്റെ
വിഷമങ്ങളൊന്നും
ഒരിക്കൽപോലും പറയാത്ത മുത്തശ്ശി,

തന്റെ ചുറ്റും കൂട്ടിയിട്ടിരിക്കുന്ന
ചപ്പുചറുകൾ കണ്ടു അന്ധാളിച്ചു
നെഞ്ചുപൊട്ടി വിളിച്ചു.

ചുറ്റിനും മലിമസമാക്കുന്ന അഴുക്കുകൾ
കാണുമ്പോൾ വിങ്ങിപ്പൊട്ടാറുണ്ട്.
ഇതിൽ നിന്നും മോചനമില്ലേ ?

ഇപ്പോൾ മുത്തശിയുടെ പ്രായം
നൂറ്റിപ്പതിനാറു ,
ചെറുപ്പത്തിന്റെ ചുറുചുറുക്കാണ്‌
ഇപ്പോഴും മുത്തശിക്ക്,

സങ്കടം ഒന്നേയുള്ളു,
മാലിന്യം നിറഞ്ഞ തന്റെ  വയർ
ശ്വാസം മുട്ടുന്നു,

ഇങ്ങനെയെങ്കിൽ
അകാലത്തിൽ ചരമമടയാൻ വിധിക്കപ്പെട്ട
പാവം പുരാവസ്തുവാകാൻ
അധികകാലം വേണ്ടിവരില്ല.

ഓ.... അപ്പോളാണ്  മുത്തശ്ശിയുടെ വിളി
പരിസ്ഥിതിവാദികൾ കേട്ടത്...

അവർ ഓടിയെത്തി. എന്നെ തഴുകി
ചുറ്റിനും നടന്നു. അവർ ഒറ്റക്കെട്ടായ്
പ്രതിജ്ഞയെടുത്ത്..

ചരിത്രത്തിലേക്ക്
മണ്മറഞ്ഞു പോകുമായിരുന്ന എന്നെ,
 ഇനി അവർ  സംരക്ഷിക്കാമെന്ന്
ഉറപ്പ്  തന്നു.

അങ്ങനെ ഒന്നേകാൽ ശതകം വയസ്സുള്ള
എന്റെ വലുപ്പം എത്രയെന്നോ ?
വീതി പത്തര മീറ്റർ
അത്രയും തന്നെ ആഴവും...

എന്നെ നിർമ്മിച്ചു സുന്ദരിയാക്കിയത്,
റാംസം ആൻഡ്  റാപ്പിയർ
ഇന്ഗ്ലീഷ്‌ കമ്പനി.

തൃശൂരിൽ ആദ്യം ആവിയെഞ്ചിൻ
ഓടിത്തുടങ്ങിയപ്പോളാണ്
എന്റെ ജനം.....

 എന്നെ പൈതൃകമായി
കാത്തു സൂക്ഷിക്കാമെന്നു പറഞ്ഞപ്പോൾ
സമാധാനമായി...
ഞാൻ തുള്ളി ചാടുന്നത് കണ്ട്
മന്ത്രി, എന്നെ തൊട്ടു നമസ്കരിച്ചു.

പഴയ പ്രതാപം
വീണ്ടെടുത്തോളാമെന്ന് മന്ത്രി.
ഞാൻ സംതൃപ്തയായി.
ഒരു നാടിന്റെ പ്രതാപം എന്റെ നീരും
ഇനി ജനങ്ങളുടെ കൈയ്യിൽ....
ദേവൻ തറപ്പിൽ
🌹🌹🌹

ബലികാക്കകള്‍

ബലികാക്കകള്‍
കര്‍ക്കിടകത്തിലും കാക്കച്ചിമാർക്ക്
കിന്നാരം ചൊല്ലാൻ തിടുക്കമായി

കർക്കിടകംവന്ന് പോയൊരുനേരത്തും
കൈകൊട്ടിയാരും വിളിച്ചതില്ല

ബലിയുംബലിപ്പുരേല്‍ വറ്റ് കൊടുക്കാതെ
പോയപ്പോൾബഹളമായ് കാക്കച്ചിമാർ

പുത്തൻകലത്തില് പുത്തരിച്ചോറേറെ
പായസോം നീട്ടി വിളിച്ചതില്ല

കൈകൊട്ടികാക്കയെയാരുംവിളിച്ചില്ല
ആചാരമൊക്കെ മറന്നു പോയോ

കാക്കച്ചിമാർ വന്ന് ക്രാക്രാ വിളിച്ചിട്ടും
ഒറ്റമണിച്ചോറെറിഞ്ഞില്ലാരും

എല്ലാംപിശുക്കാരെന്നോതിയകാക്കച്ചി
നന്നായ് ശപിച്ചു പറന്നകന്നു
ദേവൻ തറപ്പിൽ


Saturday, 15 July 2017

പ്രണയഗീതകം

അസ്ത്രമേറ്റിട്ടവളിൻ വാക്ശരങ്ങളാൽ 
അസ്തമിച്ചല്ലോ ഹൃദയത്തുടിപ്പിന്നു  

നെഞ്ചിലഗ്നിയും കോരിയിട്ടിട്ടവൾ  
നെച്ചൂകൂടംതകർത്തും കടന്നുവോ

പ്രണയംനടിച്ചെന്റെ കൂടെനടന്നിട്ടു
പ്രഹരങ്ങളേല്പിച്ചു യാത്രപോയി

ചുറ്റിനടന്നെത്ര പാർക്കുകൾ ബീച്ചുകൾ
ചുറ്റിക്കറങ്ങുന്ന ഭ്രമമാണുപോലും 

ചുട്ടുപൊള്ളിച്ചവൾഹൃദയംകനൽവീഴ്ത്തി 
ചുറ്റിവീണല്ലൊഞാൻകണ്ണീർക്കയത്തിലും  

വത്സരം താണ്ടി താണ്ടിയാവേളയിൽ 
മത്സ്യകന്യയാമവളുംപിരിഞ്ഞുപോയ്‌

അമ്പുകൊണ്ടും മുറിവേറ്റമാനീനെപ്പോൽ
അസ്ത്രമെയ്ത് തകർത്തെൻറെ ഹൃദയവും 

ഇരവുംപകലിലുംനൊമ്പരമന്യോന്യം 
ഇതൾവിടർത്തിപങ്കുവെച്ചെത്രയോ  

കരളുമുഴുതുമറിച്ചവൾ പോയപ്പോൾ 
സരളമാംഹൃദയ ശബ്ദംനിലച്ചുപോയ്

ഹൃദയസാഗരംതേങ്ങിടുന്നിപ്പോഴും
കരൾതുടിക്കുന്നവല്ലവൾക്കായിട്ട്   

പെയ്തൊഴിയട്ടെ പെരുമഴക്കാലമെന്‍ 
ഹൃദയതന്ത്രിയും കുളിരണിഞ്ഞീടട്ടെ
ദേവൻ തറപ്പിൽ 

കാവ്യാ തീരം

ഗ്രൂപ്പ് സഹോദരങ്ങോട്
അപേക്ഷ... 🙏
----/-/---
കേണുവീണുഞാൻ കണ്ണീർപൊഴിക്കുന്നു
"കാവ്യതീര"ത്തിൽ ക്ലിപ്പിംഗിട്ടെക്കല്ലേ...

എന്നിട്ടുംകണ്ടില്ലെന്നു  നടിക്കുന്നോർ
വിശ്രമിക്കട്ടെഗ്രൂപ്പിൻപുറത്തല്പം....

ചിട്ടവട്ടത്തിൽസാഹിത്യസദ്യയായ്
ചുറ്റുംകൂടി വിളമ്പിക്കഴിച്ചിടാം...

എങ്കിലുംരക്ഷയില്ലാതെവന്നീടിൽ
നീക്കിടുമെന്നുംനിർഭയംചൊല്ലുന്നു

തെറ്റുഞാനെങ്ങാൻചെയ്തുപോയെങ്കിലോ
പക്ഷമില്ലാതെ ചൊല്ലണംനിങ്ങളും....

കാവ്യതീരത്തിൽപക്ഷമായൊന്നുംഞാൻ
ചെയ്യുകില്ലെന്നുംവാക്കും തരുന്നിപ്പോൾ...
ദേവൻ തറപ്പിൽ
🙏🙏🙏

Friday, 14 July 2017

ഒക്കെത്തു വിത്തുണ്ടെങ്കിൽ
തക്കത്തിൽ കൃഷി ചെയ്യാം
പക്കത്തു വന്നാൽ നിങ്ങൾ-
ക്കൊട്ടേറെ വിത്തും നൽകാം

ഏറെ വിളഞ്ഞതെല്ലാം
പാടെ നിരന്നു കാണാം
ഓണം വരുമ്പോഴേക്കും
കുത്തരി വെച്ചിടേണം
ദേവൻ തറപ്പിൽ 

Sunday, 9 July 2017

ബാല്യകാല സഖി


അപ്പുഴവക്കിലെ കായ്ക്കാനിത്തോപ്പിൽ
ഉൾപ്പുളകത്തോടെ കണ്ടവളെ, 

ചന്ദനക്കുറിയും നെറ്റിയിൽചാർത്തിയ 
ചന്ദ്രിക സഖിയും വന്നുവല്ലോ, 

ചാരത്ത് വന്നവൾ ബാല്യകാലത്തിന്റെ 
കഥകൾ മെല്ലെമൊഴിഞ്ഞുവല്ലൊ  

മാറത്തെതാമര പൊട്ടൊന്നു നോക്കിപ്പോൾ  
ചൂളിപ്പോയല്ലെന്റെ പെൺകിടാവ്, 

ലജ്ജിച്ചു പോയവൾ യൗവ്വനതീഷ്ണയാൽ 
കാൽനഖം കൊണ്ടു കഥപറഞ്ഞു 

സ്വപ്നങ്ങളൊക്കെയും പൂത്തനേരത്തവൾ 
സ്വപ്നാടകെയെപ്പോൽ പുഞ്ചിരിച്ചു

മോഹിച്ചു ഞാനപ്പോൾ വാരിപ്പുണരുവാൻ
മോഹമടക്കിയും ഞാൻ കാത്തിരുന്നു... !
ദേവൻ തറപ്പിൽ 
❤❤❤

Saturday, 8 July 2017

ബാല്യകാലം... !

ബാല്യകാലം.. !
ഓർമ്മതൻ വഴിവക്കിൽ ഓടിത്തളരവേ,
മിഴികളിൽ കണ്ണുനീർ ചാലുതീർത്തു..?

ഇന്നുമറിയുന്നു ഞാനെന്റെ ബാല്യത്തിൻ,
നൊമ്പരപ്പൂക്കളിൻ അഗ്നിതീർത്ത് !

ഏകനായന്നു ഞാൻ  തനിയെ നടന്നപ്പോൾ പിൻവിളികേൾക്കാൻകൊതിച്ചതത്രേ...!

ആശകളൊക്കെയും അസ്തമിച്ചപ്പോളോ
വാശിയിൽ ഞാനും യാത്രയായ്... !

ഒരു പിടിനൊമ്പരം ഹൃദയത്തിൽ പേറിഞാൻ
ഒരുപുതു ജീവിത തേടിയാത്ര... !
ദേവൻ തറപ്പിൽ

അമ്മ ദൈവം...!

അമ്മ ദൈവം...!
കാണപ്പെടുന്നതി ഭൂമിയിൽ മക്കളിൻ
നന്മകൾ മാത്രം കൊതിക്കുമമ്മ ,
ദീനംപിടിച്ചു പോയെങ്കിലോയെന്റെമ്മ
ഉണ്ണാതുറങ്ങാതെ തലോടിയപ്പോള്‍
മക്കൾക്കു നന്മകൾ മാത്രം കൊതിക്കുന്ന
മന്നിൽ മഹാദൈവമാണല്ലമ്മ
ഹൃദയത്തിലെന്നും ഞാൻ പൂജിച്ചിടുമമ്മേ
ഒടുവിലിശ്വാസം നിലക്കുംവരെ...!
ദേവൻ തറപ്പിൽ 

Thursday, 6 July 2017

തീവണ്ടി... "

തീവണ്ടി.... !
വണ്ടീ വണ്ടീ തീവണ്ടീ
തെണ്ടി നടക്കും തീവണ്ടി....

ആളെക്കണ്ടാൽ നിൽക്കും നീ,
ആളെക്കറക്കും  കൂവണ്ടീ...

പച്ചക്കൊടികൾ  കണ്ടാലോ
കൂകിവിളിച്ചു പായും നീ..

ഇരവും പകലും  സേവനടത്തും
ഇരുതലായുള്ളൊരു ഭൂവണ്ടി..

കാണാനെന്തൊരു സുന്ദരി നീ
കണ്ടാലെന്നും  പതിനേഴോ..?
ദേവൻ തറപ്പിൽ

Wednesday, 5 July 2017

കാക്കയുംകറുത്തശീലയും

കാക്കയുംകറുത്തശീലയും 
----------
ചാളയുണക്കാൻ കുഞ്ഞമ്മ
മുറ്റത്തങ്ങു നിരത്തിപ്പോൾ
കാക്കകൾ വട്ടം ക്രാക്രായിട്ട്
ചാളേം കൊത്തിപ്പോയല്ലൊ
ദേഷ്യംമൂത്തൊരു കുഞ്ഞമ്മ
കാലൻകുടയിൻ ശിലകീറി
കെട്ടിത്തൂക്കി മുറ്റത്തു...!
കാക്കേ കെട്ടി തൂക്കിയപോൽ
കണ്ടൊരു കാക്ക കൂട്ടങ്ങൾ
ശിലയും കണ്ടു ഭയന്നോടി
പുഞ്ചിരിതൂകി കുഞ്ഞമ്മ..!
ദേവൻ തറപ്പിൽ 

Tuesday, 4 July 2017

പലപേരിൽ ഭൂമി..

പലപേരിൽ ഭൂമി..
ജന്മിമാർ കൈയ്യിൽ ഭൂമിയെല്ലാം
കയ്യടക്കിയ പണ്ട് കാലം 
നൂറുപേരിൽ അറിയുന്നു ഭൂമിയും 
ജന്മം കിട്ടിയ പാട്ടഭൂമി ,
ജന്മം ഭൂമി ഏറുകണം പാട്ടംപാട്ട 
കാണാപ്പാട്ട വ്യവസ്ഥഭൂമി  
പാട്ടച്ചീട്ട് കൃഷിക്കാരൻ വെറുംപാട്ടം 
പേരുകൾ നാട്ടിൽ പലവിധം  
പല്ലുപോയ നായയെപ്പോലെ പൈതൃകം 
മണ്മറഞ്ഞല്ലോ പുരാധനങ്ങൾ 
ദേവൻ തറപ്പിൽ 

തൊഴുത്ത് പലതരം

തൊഴുത്ത് പലതരം
----------
കൂട്ടുതൊഴുത്തു താഴെക്കുറ്റി
പുല്ലൊട്ടി പുല്ല് കൊണ്ടാടി ,
തൊട്ടിപ്പുരതൊട്ടി തൊട്ടിക്കഞ്ഞി
കുയ്താളിപാത്തി കുറുമ്പൻ കല്ല്
കാല്തൊട്ടി കടമ്പായ ഇല്ലിപ്പടി
തള്ളേത്തല്ലി അത്താണി ചെറ്റപ്പടി 
 തണ്ണീർ പന്തൽ കളിയൽ ചുട്ടുമുണ്ടു
പലതരം തൊഴുത്തുകൾ നാട്ടിൽ
ദേവൻ തറപ്പിൽ  

Monday, 3 July 2017

അളവുപാത്രം....

പത്തായപ്പുര നെല്ലറയും
വെള്ളാട്ടി ചാറ വല്ലമുണ്ട്
കുണ്ടറനിലവറ പടിപ്പുരയും
മഞ്ചപ്പൊതിയും മണ്ടലിയും
ഇടങ്ങഴി നാരായം നാഴിയുണ്ടു
പറയുണ്ട് പലതുംനിറപ്പൻപറ
സേറുണ്ടു നിറപ്പൻ ഇടങ്ങഴിയും
ഉരിയും ഉഴുക്ക് ആഴക്കുണ്ട്
പലതരം അറിയാത്ത അളവുപാത്രം
മണ്മറഞ്ഞില്ല കേരനാട്ടിൽ
ദേവൻ തറപ്പിൽ


മഴു....

മഴു....
ഇരുമ്പിൻദണ്ഡു മുറിച്ചുചതച്ചു
മരംമുറിക്കാനായുധവും
കമ്പുമുറിച്ചു ചെത്തിമിനുക്കി
പിടിയായിട്ടു കോടാലിക്ക്
ആഞ്ഞുമരത്തിൽ കൊത്തിമുറിച്ചു
വമ്പൻ മരവും കടപുഴകി
ദേവൻ തറപ്പിൽ

Thursday, 29 June 2017

എമ്മേക്കാർ....

എമ്മേക്കാർ... ?
എമ്മേ പഠിച്ചവർ ചുമ്മാതിരിക്കാതെ
മമ്മട്ടി വാങ്ങി കിളക്കിനെടാ
മണ്ണിനെ പൊന്നാക്കി ഉഴുമറിക്കുവാൻ
നിന്റെ കരുത്തും മതിയിനെടാ
കൈയ്യൂക്കും നിന്റെ മെയ്‌വഴക്കോം ചേർന്ന്
മണ്ണിനെ പൊന്നാക്കു എമ്മേക്കാരാ
ചുണ്ണാമ്പും ചൂരൽ കയ്യിൽ തൊടാത്തവർ
ചുമ്മാതിരിക്കാൻ മെനക്കേടല്ലേ
ദേവൻ തറപ്പിൽ

Wednesday, 28 June 2017

ആലിൻ തറ...

ആലിൻ തറ...
ആലിൻ ചോട്ടിലിരുന്നു ചിരിക്കാം  
ആൾത്താരകളും കണ്ടുരസിക്കാം 
സന്ധ്യയിൽ നാട്ടാർക്കൊന്നായ്‌കൂടാം 
നാടൻ പാട്ടുകൾ രസിച്ചു 
ആലിൻ തറയിലിരിക്കും 
സൊറകൾ പറയും നാട്ടാർക്കൂട്ടം 
സോള്ളും സന്ധ്യാരാവേറെ 
കാലൻ കുടയായെത്തും വയസ്സർ 
ആലിൻ തറയിലിരുന്നാലോ 
ഓക്സിജനെന്നും കിട്ടും നല്ലൊരു
വൈദ്യശിരോമണിയല്ലോ ആൽ  
ആരോഗ്യത്തിന്‌  പുണ്യംനൽകും
ആൽത്തറയാണ് ഡോക്ട്ടർസാർ
ദേവൻ തറപ്പിൽ      

കാലിക്കൂട്...

കാലിക്കൂട്...
കന്നിന് പാർക്കാൻ കരവിരുതിൽ
കല്ലുകൾ കൊണ്ടൊരു പൂന്തോപ്പ്
പഴുതുകളിട്ടും കുറ്റി തറച്ചും 
തലകൾ പോകാനാഴികളായ്
മേൽക്കൂരകളും പണിതു നന്നായ്
കാറ്റുകൾ കൊള്ളാൻ പങ്കകളും
കാലം മാറി മറിഞ്ഞതുമിന്നു 
കാലിക്കെന്നും ഓണമതായ്..
ദേവൻ തറപ്പിൽ 

പത്തായം ...

പത്തായം ....
പത്തായത്തിൻ കഥകൾകേട്ടാൽ
കല്ലുകടിക്കും നാട്ടാർക്ക് 
രാജകുടുംബം ജന്മിളൊക്കേം 
നെല്ലുനിറയ്ക്കാൻ പത്തായം
രാവുംപകലും പണിചെയ്താലോ 
ചെറുമനതെന്നും പതിരുകളും
പത്തായപ്പുര കാണണമെങ്കിൽ 
കൊട്ടാരങ്ങൾ കയറണം....
സമ്പന്നന്മാർ  ഭവനത്തിങ്കൽ 
നെല്ലു നിറയ്ക്കാൻ പത്തായം....
നിലവറ താണ്ടിയ പത്തായം
നെല്ലില്ലാതെ പട്ടിണിയിൽ...
പെരുമനിറഞ്ഞൊരു പത്തായം
പൈതൃകമായിപ്പെരുവഴിയിൽ
ദേവൻ തറപ്പിൽ



അക്ഷയ പാത്രം...

അക്ഷയ പാത്രം...
അക്ഷരത്തിന്റെ വിളക്കുമായ് ഞാൻ
അക്ഷ്യയപത്രം മുന്നിൽ വെയ്ക്കാം..!
കാവ്യങ്ങൾക്കുള്ളൊരു വേദിയാണേ
കാവ്യം നിറച്ചു വിരിഞ്ഞിടട്ടേ
അക്ഷരംകൊണ്ട് തിരിതെളിയിക്കുവാൻ
അക്ഷരജ്ഞാനം പകർന്നിടേണം !
ദേവൻ തറപ്പിൽ

അജ്ഞാനം ...

അജ്ഞാനം ...
ഒരു പിടിചിന്തകൾ പങ്കുവെയ്ക്കാം
ഒരുനൂറ്‌ കഥകൾ നിരത്തിവെയ്ക്കാം
മധുവിധുപോലല്ലോ പുസ്തകങ്ങൾ
ഇരുളിൻറെയജ്ഞാനം പെയ്തൊഴിയും
ദേവൻ തറപ്പിൽ

കടലാസ് തോണി ...

കടലാസ് തോണി ...
കയ്യിൽകിട്ടിയ കടലാസ്കൊണ്ടു
കീറിമടക്കി പണിതപ്പോൾ
അംബോ നമ്മൾ ദൂരെ കടലിൽ
കാണും നല്ലൊരു തോണിയവൻ
പുതുമഴപെയ്തു മുറ്റം നിറയെ
നദിയായങ്ങനെയൊഴുകിപ്പോ
കടലാസിന്റെ തോണിയിറക്കി
കളിയായതിലും കയറിഞാൻ.!
ദേവൻ തറപ്പിൽ

ചട്ടിമുറം

ചട്ടിമുറം 
ഈറ്റപ്പൊളിരുകൾ ചീന്തിയെടുത്ത്
നെയ്യും നല്ലൊരു ചട്ടിമുറം
ധാന്യം ചേറാൻ വീട്ടിലെടുത്തു
നെല്ലും അരിയും പേറ്റുനായ് 
പതിരുകൾ കളയാനായിട്ടമ്മ
വീശിയടിക്കും ചട്ടിമുറം
അമ്മകളഞ്ഞപ്പതിരുകൾ ഞാൻ 
കോരി തൂവും മുറ്റത്തിൽ
കുറുവടിയാട്ടമ്മ വരുമ്പോൾ 
പമ്പകടക്കും ഞാനപ്പോൾ 
ദേവൻ തറപ്പിൽ

കൃഷിയിടം

കൃഷിയിടം...
കാടിറങ്ങിയ ക്രൂരരാം
കാട്ടു പന്നികളാനയും
കൃഷിയിറക്കിയ നേരം
വിളകൾ തിന്നുമറഞ്ഞു

വിരുതുകാട്ടി വീരന്മാർ
ഉഴുതുവല്ലോ കൃഷിയിടം
വൈരമങ്ങനെ തീർത്തു
വറൂത്തിൽവീണുകർഷകൻ
ദേവൻ തറപ്പിൽ

അരഞ്ഞാണം ..

അരഞ്ഞാണം ..
ഉണ്ണിക്കൊരിത്തിരി നൂലുകെട്ടാൻ
ഊണുമുറക്കോം മറന്നച്ഛനും,
അമ്പിളിമാനോടയ്യം ചൊല്ലി
മാമനെറിഞ്ഞല്ലോ സ്വർണ്ണനൂലും,
പുഞ്ചിരിച്ചാസ്വർണ്ണ നൂലുമായി
കുഞ്ഞിന്റരയിലുംചാർത്തിയച്ഛൻ...!
ദേവൻ തറപ്പിൽ 

മഴവില്ലു

മഴവില്ലു ...
മാനമിരുണ്ടു തെളിഞ്ഞപ്പോൾ
മഴവില്ലങ്ങനെ മാനത്തു,
ഏഴഴകുള്ളൊരു വർണ്ണപ്പൂക്കൾ
മാനത്തങ്ങനെ വിടരുന്നു...
ദേവൻ തറപ്പിൽ 

തത്തമ്മ

🌹തത്തമ്മ🌹
തത്തമ്മക്കൊരു ചെഞ്ചുണ്ടു
ചോന്നുതുടുതൊരു  ചെഞ്ചുണ്ടു
കൊഞ്ചിക്കൊഞ്ചി വിളിക്കുന്ന്‌
മൊഞ്ചഴകുള്ളൊരു തത്തമ്മ

അഥിതികളെത്തും നേരത്ത്
കോരൻ മണ്ടൻ മാതുലനെ
കളിയാക്കൂലോ  തത്തമ്മ
മണ്ടനെ ശുണ്ഠി പിടിപ്പിക്കാൻ

കൊഞ്ചൽ കേൾക്കാൻ തത്തമ്മ
കൊഞ്ചിപ്പറയും അവനോടു
കളിയാക്കുന്നത് കേൾക്കുമ്പോൾ
ചെളിയും വാരിയെറിയൂല്ലോ

ചെളിയിൽ മുങ്ങിയ തത്തമ്മ
വെളിയിൽ പോടാ പുല്ലേന്നു
അതുകേട്ടപ്പോ കോരൻകുഞ്ച്
തുള്ളിച്ചാടി മറഞ്ഞൂല്ലോ
ദേവൻ തറപ്പിൽ


കണ്ണാടി കാണുമ്പോഴേ

കണ്ണാടി കാണുമ്പോഴേ 
തന്നുടെ മുഖം കണ്ടു 
നല്ലതാണെന്നു ചിലർ 
ധരിക്കും വിരൂപന്മാർ 

കണ്ണില്ലാത്തവർ കൂടി 
അന്യോന്യം മൊഴിയുന്നു 
കണ്ണുള്ളോർ കാട്ടിടുന്ന 
വികൃതി കാണണ്ടല്ലോ 

മണ്ടനായൊരു കുഞ്ഞൻ 
മണ്ടിയും മൊഴിഞ്ഞല്ലോ 
മണ്ടിക്കോ കൂരേൽ വേഗം 
മാനം ഇടിഞ്ഞു വീണേ 

ബുദ്ധിയും കണ്ണുംകാതും 
ഉള്ളവർ നമ്മൾ ദിനോം 
ഉള്ളിലും വെച്ചു തിന്മ 
ചെയ്യുന്നതെത്ര ഹീനം 
ദേവൻ തറപ്പിൽ 

Friday, 26 May 2017

ഒത്തുപിടിച്ചോളിൻ/

ഒത്തുപിടിച്ചോളിൻ ,നമ്മൾ 
ഒന്നായ് വന്നോളിൻ 
ഒത്തിരിയൊത്തിരി നേടാനായി  
ഒരുമിച്ചു നിന്നോളിൻ !

മലയാളത്തിന്നോർമ്മ പുതുക്കാൻ 
മാലയാണ്‍ഭാഷ പഠിച്ചോളിൻ 
വിദ്യയൊരുക്കീം സദ്യയൊരുക്കീം 
ഒന്നായ് ചേർന്നോളിൻ !

പൊന്നോണത്തിന്നോർമ്മപുതുക്കാൻ 
പൂക്കൾ നിറച്ചോളിൻ 
അത്തപ്പൂവിട്ടും ഒത്തു പിടിച്ചും  
ഒന്നായ് ചേർന്നോളിൻ !

മഞ്ഞക്കിളിയും ഓണതുംബീം
പാറിനാടക്കട്ടെക്കട്ടെ 
അക്കരെയിക്കരെയെല്ലാം നോക്കി 
ഒന്നായ് ചേര്‍ന്നോളിന്‍ !

മാനവരെല്ലാം മാധവസേവയിൽ
ചേരാന്‍ വന്നോളിൻ 
ഒത്തിരിയൊത്തിരിയോർമ്മപുതുക്കാൻ 
ഒന്നായ് ചേർന്നോളിൻ ,
ദേവൻ തറപ്പിൽ ,10/09/2010 

Wednesday, 17 May 2017

പച്ചമണ്ണും സ്വപ്നമോ !

പച്ചമണ്ണും സ്വപ്നമോ !
--------
പച്ചപ്പു കാണുമ്പോൾപുഞ്ചിരിയേകിടും
പച്ചനിറത്തിൽ പ്രണയവർണ്ണം !
പച്ചനിറമില്ല കേരള നാട്ടിലും
ഫ്ലോട്ടുകളാക്കി വിറ്റീടുന്നു നാം
പുഞ്ചപ്പാടങ്ങളും കേരവൃക്ഷങ്ങളും
എങ്ങോമറഞ്ഞൊരു കാഴ്ചയല്ലോ
ഉച്ചവെയിലിന്റെ തീഷ്ണതയിൽ നമ്മൾ
അൽപമിരിക്കാൻ കൊതിയോടാഞാൽ
അക്കരപച്ചകളെല്ലാമുണങ്ങീല്ലൊ
അല്പം തണലിവിടെങ്ങുമില്ല
ചുറ്റും തിരിഞ്ഞങ്ങു നോക്കുന്ന നേരത്തിൽ
പൊക്കത്തിൽ നിൽക്കുന്നു ബങ്ക്ലാവുകൾ
പാരിസ്ഥിയെ നാം കൊന്നു വികസനം
നേടുമ്പോൾ പാരിടംവിണ്ടു പോകും
മണ്ണിനെ വിണ്ണാക്കിമാറ്റുന്ന മാനവൻ
മണ്ണു തേടിയിനിയെങ്ങു പോകും..?
ദേവൻ തറപ്പിൽ !

Wednesday, 10 May 2017

പീഡനായനം ....

പീഡനായനം ....
പിഞ്ചുകുഞ്ഞിനെ ക്രൂരമായ് ഭോഗിച്ചു
നെഞ്ചുകൂടം തകർക്കുന്ന നേരത്തും
നിശ്ചലം മൂകസാക്ഷിയായപ്പൊഴും
വിണ്ണിൽതാരകം കണ്ണീരുവാർക്കുന്നു

ചോരയിൽ മുങ്ങി ചുണ്ടും കവിളുകൾ
ചോരയിറ്റിറ്റു ഒഴുകുന്നു മെയ്യിലും
നെഞ്ചിൻ കൂടം ഉഴുതു മറിച്ചപ്പോൾ
ചങ്കുപൊട്ടിപ്പോയ് പർവ്വതനിരകളിന്‍

പക്ഷികൾ വന്യജീവികളൊക്കെയും
ഞെട്ടിയെല്ലാമൊളിച്ചല്ലൊ മാളത്തിൽ
ഭൂമിയെങ്ങും വിറച്ചു നടുങ്ങീട്ടും
ഭൂതലത്തിൽ മയക്കത്തിൽ മാനവർ

മരണ വെപ്രാളശയ്യയിൽ പൈതലും
തൊഴുത് കേണിട്ടലറിയ നേരത്തു
നിശ്ചലം മൂക സാക്ഷിയായപ്പോഴും
ഷണ്ഡരായിന്നു കണ്ണീരു വീഴ്ത്തുന്നു

കീറിപ്പറിച്ച തുടയിൽ ചോരപ്പുഴ
ഒഴുകിയിട്ടും കരളലിയാത്തവർ
തുമ്പിയെപ്പോലെ പാറിപ്പറക്കേണ്ട
തുമ്പപ്പൂവേ അറുത്തു കളഞ്ഞുനാം
നിഞ്ചലം മൂകസാക്ഷിയായപ്പോഴും
ഭൂമിദേവിയും കണ്ണീരു വാർക്കുന്നു

താരശോഭയിൽ എത്തുന്ന മന്ത്രിയെ

പുഞ്ചിരിച്ചു വരവേൽക്കണം പൈതൽ
ചുട്ടു പൊള്ളുന്ന ചൂടിലും പൂത്താലം
കൈയ്യിലേന്തി നിൽക്കാൻ വിധിച്ചവർ 

വന്ധ്യ ബാധയേൽ നീതി പീഠങ്ങളോ
വന്ധ്യംകരിച്ച നിയമശാസ്ത്രത്തിലും
ലാസ്യഭാവത്തിലെഴുതുന്നു സാഹിതി
ദാസരായിന്ന് സാഹിത്യവർഗ്ഗവും

പേറുവേണ്ടെന്നു ശപഥം എടുക്കണം
പേറ്റിക്കാറ്റിൽ പതിരായ്ക്കളയുവാൻ
അന്ധകാരത്തിന്‍ ചക്രവ്യൂഹത്തിലും
അന്ധരായി ഉറങ്ങുന്നു നീതിയും 

തുന്നിക്കൂട്ടിയ പൈതലിൻ ദേഹത്തിൽ
ചങ്കു പൊട്ടിക്കരയുവാൻ പെറ്റമ്മ
അമ്മയെന്നുള്ള രണ്ടു ലോകാക്ഷരം
മന്നിലെന്നും വിധിക്കുന്നു കണ്ണീനീർ..?
ദേവൻ തറപ്പിൽ ..

Friday, 28 April 2017

വിത്തും കലപ്പയും കാലം മറച്ചപ്പോൾ

നാടൻ പാട്ടു ......
വിത്തും കലപ്പയും കാലം മറച്ചപ്പോൾ 
ഞാറ്റു വേലകൃഷി പാടേപോയി(2)
വയലില്ല തോടില്ല പച്ചപ്പിൻ മലയില്ല 
പുഞ്ചപ്പാടങ്ങളും വേരറ്റു പോയ് 
(വിത്തും )
വിത്തുവിതക്കുന്ന കൊയ്ത്തുപാടങ്ങളിൽ  
ഞാറിട്ടപോലല്ലെ ഗോപുരങ്ങൾ 
ഞാവല്പഴങ്ങൾ പഴുത്തുള്ള തോടിലും 
ഞാന്നു കിടക്കുന്നു സൗധങ്ങളും  
(വിത്തും )
കല്ലും വടിയും മരക്കുന്തവുമായി -
ട്ടമ്പുംവില്ലുമായി നായാടിയോർ 
കല്ലിലുരച്ചും തീകത്തിച്ചു വേവിച്ചു 
കാട്ടു കിഴങ്ങുകൾ തിന്നകാലം
(വിത്തു)
അക്ഷരമില്ലാതെ കാലത്തവർകളും 
ആംഗ്യത്തിലാണല്ലോ ആശയങ്ങൾ  
ആട്ടക്കഥകളും തുള്ളലും സാഹിത്യവും 
തോറ്റംപാട്ടൊക്കെ നിറഞ്ഞുപണ്ടു 
(വിത്തു)
നാടൻ ശീലുകളും നാടൻ പാട്ടുകളും
നാടൻ കളികളും പണ്ടുണ്ടായി 
നാണം മറച്ചതു പച്ചിലകൾ കൊണ്ടും 
പല്ലുമുരച്ചതു മാങ്കൊമ്പിനാൽ
(വിത്തു)
ആര്യകുണ്ടോ പാടം കുഴഞ്ഞാടി പാടം 
അയ്യാവഴി തറുവൻ കുഴിയാർപ്പാടം 
അങ്ങാടി പാലേരി എടവം പുഞ്ചപ്പാടം
എണ്ണിയാൽ തീരാത്ത വയലുംപണ്ടു  
(വിത്തും )
ഒരുനിലപ്പൂ,നിലം മൂപ്പുനിലം ഏലായ്
തറയൻ കണ്ടങ്ങളും വേണമല്ലോ 
വിത്തു വിതയ്ക്കടി നെന്മണി കൊയ്യടി   
പത്തായമൊക്കെ നിറക്കു പെണ്ണേ 
(വിത്തും )
ദേവൻ തറപ്പിൽ )

Wednesday, 19 April 2017

കണ്ണില്ലാത്തോർ !

കണ്ണില്ലാത്തോർ !!!
----------*****--------
കേട്ടില്ലേ പട്ടണവാസികളെ ,
നാട്ടിൽ നടക്കുന്ന ക്രൂരകൃത്യം !
അട്ടപ്പാടിയിലെ ആദിവാസി -
യൂരിൽ മരിക്കുന്നു കുഞ്ഞുങ്ങളും !
പട്ടിണികൊണ്ടു മരിച്ചതാണേ ,
പട്ടണവാസിയറിഞ്ഞോ നിങ്ങൾ !
രണ്ടുമാസത്തിൽ മരിച്ചതെത്രെ ,
മൂന്നുഡെസ്സനിലുംമേലെയാണേ !
നാളെ വളരേണ്ട കുഞ്ഞു മക്കൾ ,
നാടിന്നു തുണയായിടെണ്ടവരും !
ആദിവാസികൾക്കു മാത്രമായി ,
ലക്ഷങ്ങളെന്നുമൊഴിക്കീടുന്നു !
ലക്ഷ്യങ്ങൾ കാണാതെ പണമേരെയും ,
കക്ഷത്തിലാക്കിടുമുദ്ദ്യോഗസ്ഥർ !
ആരോഗ്യസംഘങ്ങലേറെയുണ്ടേ ,
ആർത്തിയായ് തിന്നുവാൻനേതാക്കളും !
നൈജീരിയ,ആഫ്രിക്കാൻ രാജ്യമല്ലേ ,
ഭാരതമെന്ന ധൂർത്തിന്റെ നാടു !
ആദിവാസിയുടെ പേരും ചൊല്ലി ,
ആക്രിയിൽ മുക്കുന്നുകോമരങ്ങൾ !
തെണ്ടിനടക്കുന്നോൻ കയ്യിൽനിന്നും ,
തെണ്ടികൾ തട്ടിപ്പറിച്ചിടുന്നേ !
"ഹാ.....". കഷ്ടമെന്നു പറയേണ്ടുഞാൻ ,
കണ്ണില്ലാത്തോരാണോ" നമ്മളിന്നു !
ദേവൻ തറപ്പിൽ !

Monday, 17 April 2017

പഠനക്കളരി

പേരുപോൽ തന്നെയഭിരാമത്തിൽ 
പോരുകളൊന്നിനും നേരമില്ല ,
ചേരുന്നസമയം ഞാൻ വന്നുനോക്കാം 
പോരട്ടെ സാഹിത്യകുസുമങ്ങൾ ..!


വരുവാനിക്കേതും മടിയുമില്ലേ 
തരുവാനനേകം ഹൃത്തിലുണ്ട് 
വന്നിടാമഭിരാമപ്പൂവാടിയിൽ 
സമയമാണല്ലോ പ്രശ്‌നമിന്ന്


പഠനക്കളരിയൊരുക്കിയെന്നും 
ചടുലതയോടെ നിരീക്ഷണങ്ങൾ 
പലതും പഠിക്കാൻ തുണയേകിടും 
അഭിരാമ പുഷ്പത്തെ വന്ദിച്ചിടാം 

കാലത്തെണീറ്റാൽ ശുഭവാർത്തയൊന്നും.
കേൾപ്പാനുമില്ലാ ഭുവനത്തിലീശാ!.
തിണ്ണേലുറങ്ങുന്ന കുരുന്നിനെല്ലാം
നീതന്നെയെന്നും തുണയേകിടേണം!

പ്രാണൻ പിടഞ്ഞല്ലൊ നേർകാഴ്ച കണ്ടു 
ആസിഡ് വീണുകരിഞ്ഞ പെൺസ്വരൂപം 
ഒറ്റപ്പെടുത്താതെയവളെ  രക്ഷ -
നീതന്നെയെന്നും തുണയേകിടേണം
ദേവൻ തറപ്പിൽ 

സൈബർ കുലം കുത്തി

സൈബർ കുലം കുത്തികൾ
---------------
നെഞ്ചോട് ചെങ്കൊടി ചേർത്തു വച്ച്
സങ്കോചമില്ലാതെ ചൊല്ലിടുന്നേ
എന്നും സമരത്തിൽ മുന്നിൽ ഞാനും
കൊല്ലും കൊലയിൽ ഞങ്ങൾതന്നെ

സത്യം പറഞ്ഞാൽ ദഹിക്കത്തോർകൾ
ചുറ്റിനും വന്നു കുരച്ചിടുന്നേ  ....
സഹിഷ്ണത എന്തെന്നറിയാത്തോരും
സഹനം പഠിപ്പിക്കും സൈബറിലും

അഭിനവരായോർ കുലം കുത്തികൾ
അഭിനയിക്കുന്നു സഖാക്കളെന്നു
നെറ്റിലെഴുതി വച്ചിട്ടു വേണോ
മാധ്യമങ്ങളിൽ കുറിച്ചിടാനും ...

ലൈക്കും കമന്റിനും വേണ്ടിയല്ല
നേരും നെറിയും തുറന്നു കാട്ടാൻ
കമ്മ്യൂണിസ്റ്റെന്നൊരു ആശയത്തി -
ന്നെന്ത് വില നൽകി സോദരരെ ...

സത്യം പറഞ്ഞാൽ പിണറായിക്ക്
എതിരെന്ന് ചൊല്ലും സഖാക്കളേറെ
അധികാരമത്തിൽ അമർന്നിരിക്കും
പിണറായിക്കോട്ടിൽ മറുപടിയും
ദേവൻ തറപ്പിൽ ...

പുലയാടി മക്കള്‍

പുലയാടി മക്കള്‍
========
പുലയാടി മക്കള്‍ക്ക്‌ പുലയാണ് പോലും
 പുലരിയിൽ നീതിക്ക് വാദിച്ചുവെങ്കിൽ

പുകയുന്നനീതിയിൽ  ഏരിയുന്നു നാട്ടിൽ
പുകമറ തീത്തു വിളയാടുംസംഘം

പുതുപുത്തന്‍ സമ്പത്ത് വ്യവസ്സ്ഥയില്‍ നാട്
പുണരുന്നു പീഡനമനുദിനം നാട്ടിൽ

വഴിനീളെ മൃതദേഹം കണികാണുംനാട്ടിൽ
ഇരവിലും പകലിലും ചോരകള്‍ നിത്യം

പുലര്‍വോളം കാത്തിങ്ങിരിക്കാണൊ നമ്മൾ
പുലയാടി മക്കളും പുലയാടാൻ നാട്ടിൽ

പുലരിയിൽ കേൾക്കുന്ന ആർത്തനാദങ്ങളിൽ  .
പുലയാടി മക്കള്‍ ഭരിക്കട്ടെ നാട്ടിൽ

ശവങ്ങളും ചോരയും തിന്നും കുടിച്ചും
പുലയാടി പുണരട്ടെ പാർട്ടികൾ നിത്യം

പുഷപ്പങ്ങളൊക്കെയും വെക്കുവാനായിട്ട്
പുലതീരുവോളം രക്തം ഒഴുക്കിടട്ടെ

രക്തത്തിൽ തീർക്കുന്നു രക്തസാക്ഷികളിൽ
പുഷ്പ്പ ചക്രങ്ങളും തീർത്തിടു നിങ്ങൾ

പച്ചമാംസങ്ങളും തലകളും ചിതറട്ടേ
രക്തപ്പുഴയും ഒഴുക്കി ഭരിച്ചിടാം

അധികാര മത്തിൽ പിടിച്ചിവര്‍ നാടിന്‍റെ --
യകിടും മുറിച്ചു ഭരിക്കണോ നാടും

കഴുവേറ്റിടുന്നല്ലോ ഉള്ളത്തില്‍ പേറിടും
ഭാരത മക്കളെ അധികാര മത്തിലും

എന്തൊരു ക്രൂര വിനോദമേ കോടതീ
ഹന്ത നീതി നിഷേധം നീ കാണില്ലേ..!!
ദേവന്‍ തറപ്പില്‍
========

Thursday, 13 April 2017

വ്യത്യസ്തനാമൊരു !!

വ്യത്യസ്തനാമൊരു !!
------------
വ്യത്യസ്തനാമൊരു മദ്യരാജാവിനെ 
സത്യത്തിലാരും തിരിച്ചറിഞ്ഞീലാ 
കള്ളടിക്കുന്നോർക്കു തലവനാം രാജാവ് 

വെറുമൊരു രാജാവല്ലിവനൊരു കാലൻ
ഷാപ്പുകൾ സ്ഥാപിച്ചു അതിക്രൂരനായവൻ
മദ്യമൊഴുക്കി പട്ടിണിയാക്കുന്നോൻ
നാടിൻ കാലൻ കാലൻ കാലൻ [2]


പതകൾ തുളുമ്പുന്ന കള്ളുമായെത്തി
ചതിയിൽ ചിരിക്കുന്ന മീശക്കണാരാ
മാളോരെ കാണുമ്പോൾ വെളുക്കെ ചിരിച്ചു
ഷാപ്പിന്റെ പിന്നിൽ ഒളിക്കുന്ന വീരാ......
ഷാപ്പുരാജാവിന്റെ കൈകളിൽ പെട്ടപ്പോൾ
നാടൊരു കൂട്ടക്കുരുതിയായ് മാറി ..
ഒന്നുമേ അറിയാത്ത പാവത്തിനെപോലെ
കള്ളു കുടിപ്പിച്ചു കൊല്ലുന്ന പൊണ്ണൻ
കുള്ളൻ ഇവനൊരു കാലൻ 
കാലൻ കാലൻ [2]

കള്ളിൽ മയങ്ങുന്ന കുടിയന്മാർ പലരും
കുഞ്ഞിനെപോലെ കരയുന്നു വീട്ടിൽ
അടിയും തടയും തടുക്കുന്ന വീട്ടിൽ
അല്ലലില്ലാതെ കുടിക്കുന്നു 
കുടിയർ
വ്യത്യസ്തനാമൊരു മദ്യരാജാവിനെ
സത്യത്തിലിപ്പോൾ തിരിച്ചറിയുന്നു
ഇടിവീണകുണ്ടിന്റെ അഭിമാനമാകാത്ത
മദ്യരാജാവേ നിക്കഭിവാദ്യം
കുള്ളൻ ഇവനൊരു കാലൻ 

കൊലക്കളമാക്കുന്ന നാടിൻ 
കാലൻ കാലൻ കാലൻ [2]
[ ദേവൻ തറപ്പിൽ ]

Saturday, 8 April 2017

നീർകണങ്ങൾ !!

നീർകണങ്ങൾ !!
-----==-----
പേരറിയാത്ത തീർത്ഥവികാരത്തിൽ  
 പ്രേമത്തില്‍ മോഹിച്ചു ഞാനും ..
മണ്ണിൽ വീണുടയുന്ന നീർകണങ്ങൾ 
കണ്ണുനീരെന്നും പേരിട്ടുപോയി ,


കണ്ണുനീര്‍പ്പുഴകൾ പെയ്യുമ്പോൾ
ഉടയാച്ചിരിയുമായ്‌ കുടനിവർത്തി ,
നോവിന്‍റെ തേങ്ങലില്‍ കരളു വിങ്ങുമ്പോൾ
മുത്തുകൾ കോരിഞാൻ നല്കിയല്ലോ


ഉടയാത്ത മുത്തുകൾ തേന്മലരാക്കി ,
മാലകോർത്തണിയാൻ കൊടുത്തു
സുറുമയിൽ നീ വരച്ചിട്ടാതാം മിഴിയിൽ
പ്രണയമധുരം തുളുമ്പി നിന്നോ ..?


സൂര്യകാന്തിപ്പൂക്കൾ ശോഭപരത്തിയ
നിന്നിൽ വെന്മകൾ തിളങ്ങിയില്ലേ ..?
വിണ്ണു പുലരുവാൻ കാവലായ് നിന്നൊരു
സൂര്യപുത്രിയെപ്പോലെ നീയും ...?
രാവിൽ വിടരുന്ന വെണ്മതന്‍ പൂവിൽ
ഭൂമിദേവിക്കു നീ നിറമാലയും.......!

നീതി കൊടുക്കക ...!!

Image may contain: 1 personനീതി കൊടുക്കക ...!!
കണ്ണുതുറക്കുക സത്യം കാണുക
കമ്മ്യൂണിസ്റ്റു കുലംകുത്തികളെ
സത്യമിരുട്ടിൽ മറച്ചെന്നാകിലും
മിഥ്യയതാകില്ലെന്നതുമോർക്കു

അധികാരത്തിൻ മത്തിലിരിക്കും
അരുതാത്തതുകൾ ചെയ്യുന്നൂരേ
ആരുതരുതെന്നു പറഞ്ഞ ജനത്തോ-
ടാക്രോശിക്കും കയ്യൂക്കാലേ ...

അന്ധതകൊണ്ട് മറച്ചെന്നാലും
വന്ധ്യത കൊണ്ടു മൂടിന്നാലും
കണ്ണുതുറക്കുന്നൊരുണ്ടിവിടെ
ലോകർ മുഴുവൻ കാണുംസത്യം

ഇല്ല തരില്ല നിങ്ങൾക്കും  ജനം
മാപ്പില്ലാത്തൊരു തെറ്റിന്നും
അമ്മയിൽ നിന്നു പിറന്നവരല്ലേ
അമ്മക്കിവിടെ പറയു നീതി..?
ദേവൻ തറപ്പിൽ 

Friday, 7 April 2017

പാർലമെന്റി മോഹത്തിൽ

അധികാരത്തിൻ മോഹം മൂത്തു 
അഴിമതികാട്ടിയ പേപ്പട്ടികളെ 
താഴിയിറക്കാൻ വോട്ടുകൊടുത്തു 
പാവം പാവം വോട്ടർമാരും 

വോട്ടുകളൊക്കെ പെട്ടിലായി 
ചേട്ടന്മാരും സന്തോഷത്തിൽ 
ഭരണം കൈയ്യിൽ വന്നപ്പോളോ  
ശരണം നിങ്ങൾ തന്നെയെന്നു 

ചൊല്ലിത്തീരും മുമ്പേ ഭരണം 
കൈയ്യിൽ വന്നനേരത്തും 
ഹുങ്കുകൾ കാട്ടിപുംഗവരവരും 
സങ്കടമെല്ലാം ചീറ്റിപ്പോയി 

വാക്കുകൾ കൂരമ്പായി ജനത്തിൽ 

നിത്യം ഭീഷണി പത്തിവിടർത്തി 
ഞങ്ങളു വന്നാൽ ശരിയാക്കാമെ -
ന്നോതികേട്ടൊരു കഴുതജനങ്ങൾ  

കൊള്ളനടത്തിയ വലതന്മാരെ 
തള്ളിമറിച്ചു കൊടുത്തുകസേര 
ഉള്ളൊരു വോട്ടുകൊടുത്തുകയറ്റി 
തള്ളേ,വാക്കുവിഴുങ്ങി മൂപ്പർ 

ഭരണം കിട്ടിയ നേരത്തിവരോ 

പൃഷ്ഠംകാട്ടി ജനത്തിനുനേരെ 
എന്തിനുമേതിനും കേസുമെടുത്ത് 
ചന്തം കൂട്ടിയ മന്ത്രിപ്പുങ്ങവർ  

കേസ്സുകളോരോന്നായി കോടതി -

മുറ്റത്തെത്തും മുമ്പേ തള്ളി 
മടിശീലക്കു കനം നോക്കീട്ടു
വിധിപറയുന്നു കോടതികൾ 

കോടതിയെ നാം വിമർശിച്ചീടിൽ 
കോടതിയലക്ഷ്യം തലക്കുമീതെ
അഴിമതിമുങ്ങിയ ജഡ്ജിക്കാരും 
അതിരുവിടുന്നേ നമ്മുടെനാട്ടിൽ

കോടതിയെന്തു പറഞ്ഞാന്നാലും 
ഓച്ചാനിച്ചതു പാലിക്കേണം
ശംഭോ ശിവ ശിവ എന്തൊരു ലോകം 
കണ്ടുമടുത്തെ ഭാരതലോകം 
ദേവൻ തറപ്പിൽ ....

Saturday, 18 March 2017

കടൽ വന്നു വിളിച്ചപ്പം

കടൽവന്നു വിളിച്ചപ്പം ...!!
കടൽവന്നു വിളിച്ചപ്പം കരയോട് പറഞ്ഞല്ലൊ 
കിന്നാരം ചൊല്ലാനായ് തിരികെവരാം ഞാനിപ്പം

തിരമാലകളുയരത്തിൽ മലപോലെ വരുന്നുണ്ടേ 
തിരയോടു പറഞ്ഞിട്ട് മൊഴിചൊല്ലത്തിരികെവരാം 

മലയൊന്നു തിരഞ്ഞപ്പോൾ നരവീണൊരു തലപോലെ 
മരണത്തിൽ തോടുകളും മടവീണൊരു പാടങ്ങൾ 

മലമുകളിൽ വിരുന്നു വന്നു പൂഞ്ചോല പൂപ്പന്തൽ  
കാട്ടരുവികളലറിപ്പായും വെള്ളിനിലാനീരെവിടെ 

പുലർകാലേ തുള്ളികളായ് കുളിർ കോരിപ്പെയ്യുംമ്പോൾ 
സിന്ദൂരം പൂശീയസന്ധ്യേ കതിരോന്റെ രശ്മികളുണ്ടോ 

തൂവെള്ള പതഞ്ഞൊഴുകും പാൽപുഞ്ചിരി പൂത്തുള്ള
പൂനിലാപ്പന്തൽ വിരിച്ചാ നീരുറവകൾമാഞ്ഞല്ലോ 

കളകൂജനം പാടും കിളികൾ കളഹധ്വനിയില്ലാതെ 
കതിരോന്‍റെ രശ്മികളില്ലാ,തിരുൾമൂടീ,താരകവും !
ദേവൻ തറപ്പിൽ

Friday, 17 March 2017

കയറഴിക്കല്ലെ വള്ളം ഇറക്കല്ലെ


കയറഴിക്കല്ലെ വള്ളം ഇറക്കല്ലെ
കായലില്‍ പോകല്ലേ പുന്നാരേ , മുത്തേ
കായലില്‍ പോകല്ലേ പുന്നാരേ.....

ഉടുക്കു കൊട്ടി ഞാൻ പാടി വന്നപ്പോൾ
തകിലടിച്ചില്ലേ പുന്നാരേ നീ (2 )
കായലിൽ മന്ദം തുഴഞ്ഞു പോയപ്പം
പൂനിലാവ്ല്ലൊ നീ പുന്നാരെ (2)

കസവ് കരയന്‍ മുണ്ടുമണിഞ്ഞിട്ടു
കാവിലു വന്നൊരു നേരത്ത്
ചെങ്കതിരേറ്റു നീ മിന്നി തിളങ്ങണ
ഒളിഞ്ഞു കണ്ടടി പുന്നാരേ
ഞാന്‍ ,ഒളിഞ്ഞു കണ്ടടി പുന്നാരേ ....

അന്തിനേരത്തു ഞാൻ നിന്നേ കണ്ടപ്പം
ചെമന്നിരിക്കണ് പുന്നാരേ , നിന്‍റെ
കവിൾ ചെമന്നല്ലോ പുന്നാരേ ....
ദേവന്‍ തറപ്പില്‍ ...

അംചി മുംബൈ

മലയാള സാമൂഹ്യദർപ്പണത്തിൽ
മുത്തുകൾ കോർത്തംച്ചി മുംബൈ

മലയാള സംക്കാര ജിഹ്വയായി
മതി മറന്നാടുന്നു മറു നാട്ടിലും ....

നഗര മുഖച്ഛായ ഒപ്പിടുവാൻ
അവിടെല്ലാം അംചി കൈരളിയും

മുന്നൂറു പൂക്കൾ ഇതൾ വിരിക്കാൻ
പുണരട്ടെ നഗരത്തെയെന്നുമെന്നും

നാടും നഗരോം ഉറങ്ങിടുമ്പോൾ
തൃക്കണ്ണുമായെത്തിയംചിമുമ്പയ് ...

സഹസ്രം  പൂക്കൾ വിരിഞ്ഞിടട്ടെ
സഹസ്രം  പൂക്കളുമർപ്പിച്ചിടാം
ദേവൻ തറപ്പിൽ 

സ്ഥാനമാനങ്ങൾ ചൊല്ലികലഹിച്ചു

സ്ഥാനമാനങ്ങൾ ചൊല്ലി കലഹിച്ചു 
നാണം കെട്ടു നടക്കുന്നല്ലോ ചിലർ 

മതസൗഹൃദ പേരുകൾ ചൊല്ലിയും   
മതവൈര്യങ്ങൾ കൂട്ടുന്നതും ചിലര്‍ 

അറുതിയില്ലാ വാഗ്ദാനങ്ങൾ നൽകി
അലകുമാറ്റി ഭരിക്കുന്നതും ചിലർ   

മതി ഭ്രമത്തിലും മുങ്ങിക്കുളിച്ചിട്ടു  
മനുഷ്യരല്ലാതെ മാറുന്നതും ചിലർ 

ചഞ്ചലാക്ഷിമാർ പുറകെ നടന്നിട്ടു
ചങ്കു പൊള്ളി നടക്കുന്നതും ചിലർ 

എന്നിട്ടും തോറ്റു പിന്നോട്ട് മാറാതെ 
കെട്ടിയാടുന്ന കാഴ്ചയിലും ചിലർ 

വിദ്യവിറ്റിട്ടു സമ്പത്തു കൂട്ടുവാൻ 
മദ്യവും മദിരാക്ഷിയുമായ് ചിലർ 

മംഗളമായ കൂട്ടു കുടുംബങ്ങൾ 
സങ്കടമായ കാലത്താക്കി ചിലർ 

സ്ഥാനമാനം ലഭിച്ചീടുവാൻ നിത്യം 
മാനമെല്ലാം വിൽക്കുന്നതും ചിലർ

വിത്തമേറുവാൻ വിത്തുകാളപ്പോലെ 
വിശ്വമെല്ലാം മദിക്കുന്നതും ചിലർ 

പത്നി ദീനത്തിൽ പെട്ടു മരിച്ചപ്പോൾ  
തോളിലേറ്റി നടന്നു പോയി ചിലർ 

പ്രായമായ പെൺകുഞ്ഞിനേം കൂട്ടി 
നാഴികയേറെ കത്തും വെയിലിലും 

പത്നി തന്നുടെ  മൃതശരീരം  പേറി 
നഗ്നപാദനായ് ചുട്ടുപൊള്ളും ചൂടിൽ 

വെള്ളവും ഭക്ഷണമൊന്നുമില്ലാതെയും 
------------ 

കരുണയില്ലാത്ത ലോകത്തിൽ നിത്യം 
കരളലിയിക്കും കാഴ്ച ഭയങ്കരം 

ധരണിയിൽ നിത്യം കൊല്ലും കൊലകളും 
ഭരണമെന്നൊറ്റ ചിന്തയിലും ചിലർ 

ധരണിയിന്നൊരു ഭീകരമായപ്പോൾ   
നരനുറങ്ങുന്നു പാതിയിൽ നിത്യം   

നാണയത്തിന്റെ പേരിലിന്നു ചിലർ 
നാണം കെട്ടു നടക്കുന്നണ്ടു നിത്യം 

രാഷ്ട്രീയത്തിലും കോലംകെട്ടി ചിലർ 
രാവുതോറും അലയുന്നുണ്ട് നിത്യം  

തെഴിലെടുക്കാതെ ജീവിക്കുവാൻ ചിലർ 
തെഴിലു രാഷ്ട്രീയമാക്കുന്നുണ്ട് ചിലർ   

ഭ്രാന്തമായുള്ള ചിന്തകളിൽ ചിലർ 
ഭ്രാന്തന്മാരായ് നടക്കുന്ന് രാപകൽ 

ശാന്തമായൊരു ചിന്തകളിൽ ചിലർ 
ശാന്തരായി ഗമിക്കുന്നതും കാണാം 

പിഞ്ചുകുഞ്ഞിനും പീഡനമേൽക്കുമ്പോൾ  
നെഞ്ചുകുത്തി പിടയുന്നുണ്ട് ചിലർ  

പിറന്നു കുഞ്ഞിനേം മധ്യവസ്ക്കയേം  
തൊണ്ണൂറുള്ളൊരു തള്ളയ്ക്കും പീഡനം 

പീടികത്തറേ ൽ തൂങ്ങുന്ന കുഞ്ഞിനേം 
പീഡിപ്പിച്ചു രസിക്കുന്നുണ്ട് ചിലർ 

ഒറ്റനേരത്തെ കഞ്ഞി വെള്ളത്തിനായ്    
ചെറ്റില്ലാതെ പണിയെടുക്കും ചിലർ  

പത്തുരൂപയ്ക്കും വകയില്ലാത്തോർ ചിലർ 
പട്ടിണിയിൽ മരിക്കുന്നുണ്ട്  നിത്യം 

വിത്തവും പൊന്നും കാണുന്ന നേരത്ത്
വിഡ്‌ഢി വേഷങ്ങൾ കെട്ടുന്നുണ്ട് ചിലർ 

വിത്തം കാണുമ്പോൾ  മത്തിലും നിത്യം 
സ്വസ്ഥതയില്ലാതെ വാഴുന്നതും ചിലർ 

മന്ത്രിമാരെന്നു ചൊല്ലി നടക്കുന്നോർ 
മാനമെന്തെന്നറിയാതെയും ചിലർ 

രാഷ്ട്രീയത്തിൽ പടവെട്ടിയും ചിലർ 
രാഷ്ട്ര ഭാഷയെ വെട്ടി മുറിക്കുന്നു 

സേവകരെന്നു സ്വയംപുകഴ്ത്തിച്ചിലർ 
സേവനമൊരു പോക്കറ്റിലും ചിലർ   

കർമ്മമെന്തെന്നറിയാത്തൊരിൽ ചിലർ 
ധർമ്മമൊക്കെ കളഞ്ഞു കുളിക്കുന്നു 

ആഡംബരത്തിൽ  മയങ്ങിവീണ് ചിലർ 
അത്യാപത്തിലും വീഴുന്നല്ലൊ നിത്യം 


അമ്മയേം ബന്ധുമിത്രങ്ങളേം ചിലർ 
തള്ളിടുന്നല്ലോ വഴിയമ്പലങ്ങളിൽ

വാഗ്ദാനം കേട്ട നേരത്ത് വോട്ടർമാർ 
വോട്ടുകുത്തി കൊടുക്കുന്നതുംനിത്യം 

ജാതിചൊല്ലി വിളിച്ചും കലഹിച്ചും    
ജാള്യമില്ലാതെ വാഴുന്നതും നിത്യം 

ദൈവത്തിൻ നാമം ചൊല്ലീ മനുഷ്യരെ 
ദൈവപേരിലും കൊല്ലുന്നുണ്ട് ചിലർ 

ഭാഷ വേഷാദി ഭൂഷങ്ങൾ ചൊല്ലിയും  
ഭാഗ്യവേഷങ്ങൾ കെട്ടുന്നതും ചിലർ 

ആറടി മണ്ണും ഇല്ലാത്തോരേറെയും 
ആകുലതയിൽ പെട്ടിട്ട് നിത്യവും 

മദ്യത്തിൽ മുങ്ങി മന്നവന്മാർ ചിലർ 
റോഡിൽ വീണ് മരിക്കുന്നതും നിത്യം 

വിത്തവും വിദ്യ വന്നുചേർന്നീടുവാൻ 
മന്ത്രവാദത്തിൽ കൂട്ടിടുന്നു ചിലർ 

വൈദ്യം കെണ്ടെന്നും കാലം കഴിക്കുന്നോർ  
വൈതരണി കടക്കുന്നുണ്ടു ചിലർ  

എത്ര മാനവന്മാർക്ക് കിട്ടീടിലും  
നിത്യവും കൊതിപൂണ്ടിടുന്നു ചിലർ 
ദേവന്‍ തറപ്പില്‍ ......

പീഡനത്തിന് ഓസ്കാർ ..?

പീഡനത്തിന് ഒരു ഓസ്കാർ ..? ----------------- പിണറായി നാടു ഭരിക്കും കാലം പിഞ്ചുപൈതങ്ങൾക്കും പീഡനങ്ങൾ പുലർകാലേ പത്രങ്ങൾ നോക്കിടിലോ പീഡനത്തിൻറെ കഥയൊമാത്രം കൊള്ളകൊലയേറെ കൊള്ളിവയ്പ്പും പുള്ളിവിടാതേറെ കള്ളമുണ്ടു ഒമ്പതു മാസത്തിൽ തമ്പുരാന്റെ മണ്ഡലത്തിൽ കൊലവേണ്ടുവോളം മത്സരിച്ചു കൊല മുന്നേറുമ്പോൾ നിത്യം നിരായുധർ മാനവന്മാർ ദൈവത്തിൻ നാടായ കേരളത്തിൽ ദൈവവും നാണിച്ചൊളിച്ചിടുന്നേ അമ്പലം വിട്ടോടാൻ ദേവിമാരും മാനം ഭയന്നു പൂജാരിമാരെ സങ്കടം ചൊല്ലാനായമ്പലത്തിൽ പോയാലവിടേയും പീഡനങ്ങൾ കുമ്പസാരിക്കുവാൻ പള്ളിയിലൊ പാതിരിയും കാമ ദേവനല്ലോ ഓതുവാനായിട്ടു മസ്ജീതെങ്കിൽ മുല്ലാക്കക്കും പിഞ്ചുകുഞ്ഞുവേണം ശ്രീ ഗുരുവായൂരും അമ്പലത്തിൽ ശ്രീ ഭദ്രകാളീം ഭയന്നോടുന്നു ശബരിമലയിലും വാണിടുന്ന മാളിക ദേവിക്കുമിന്ന് ഭയം ഗിന്നസ്സു റിക്കാർഡു നേട്ടത്തിലും അഭിമാനപൂരം കേരനാടു ഓസ്കാറിനായിട്ടപേക്ഷ നൽകാൻ ഓച്ഛാനിക്കുമെന്തേ മാലോകരെ ദേവൻ തറപ്പിൽ/ 06/07/17 , വല്ലതും നമ്മൾ പറഞ്ഞു പോയാൽ തമ്പുരാന്മാരാം സഖാക്കളെത്തും ഭീഷണിയാ മുഖപുസ്തകത്തിൽ വന്നുകുരയ്ക്കും ചാവാലിപോലെ

Saturday, 4 March 2017

കള്ളേ കള്ളേ നീ ഷാപ്പിലിരുന്നാല്

കള്ളേ കള്ളേ നീ ഷാപ്പിലിരുന്നാല് , മൂക്കാൻ മായം ചേർത്തോ .. 
ഷാപ്പു പൂട്ടുന്നേരം മൂത്ത കള്ളിലും ,ആകേ മായം ചേർക്കും (4)

ആറ്റു നോറ്റു ഞാൻ ഷാപ്പിൽ ചെന്നപ്പോൾ പൂട്ടാൻ തുടങ്ങണല്ലോ 

കുംഭ തീവെയിലിൻ ചൂടിൽ തണൂതണേ ശമനം തേടി വന്നേ  (2 )

ഇന്നലെ വാങ്ങിയ കള്ളുതീർന്നേ , ഇന്നൊരു കുപ്പിഞാൻ വാങ്ങാൻ വന്നു..

നെഞ്ചു വിറയ്ക്കണ് കള്ളില്ലാതെ, ശങ്കയാൽ ഞാനും വിയർക്കണുണ്ടേ   (2 )

കുപ്പിയിൽ ഞാനൊന്ന് നോട്ടമിട്ടൂ , ഓടി വന്നല്ലോ ഷാപ്പെമാനും   

പെട്ടെന്ന്പൊട്ടിച്ചു ഗ്ലാസ്സിലാക്കി, മൊത്തികുടിച്ചല്ലോ ആർത്തിയോടെ 
വായിൽ തേനായ് ഒഴിച്ചുവല്ലോ .......

കള്ളേ കള്ളേ നീ ഷാപ്പിലിരുന്നാല് , മൂക്കാൻ മായം ചേർത്തോ .. 
ഷാപ്പു പൂട്ടുന്നേരം മൂത്ത കള്ളിലും ,ആകേ മായം ചേർക്കും (2 )

മനസിൽ ദുഃഖ,ക്കാറൊഴിഞ്ഞു ഉള്ളിൽ ഉശിരൻ ഗമയും വന്നേ   
പൂത്തിരികത്തി ഹൃദയത്തിലും ,ഇരുളിൽ നാട് വിറപ്പിച്ചു ...

ഇത്തിരിമാത്രം വെളിച്ചത്തിൽ ,കത്തിജ്വലിച്ചു ഞാനലറി  
ധൈര്യ മുണ്ടോ കാണികളെ എന്നെ വന്നു തടഞ്ഞിടാമോ ...
നേരം നള്ളൊരു നേരമാണേ  ഇരുളിൽ പാടാൻ തുണവേണം 

കള്ളേ കള്ളേ നീ ഷാപ്പിലിരുന്നാല് , മൂക്കാൻ മായം ചേർത്തോ .. 
ഷാപ്പു പൂട്ടുന്നേരം മൂത്ത കള്ളിലും ,ആകേ മായം ചേർക്കും (2 )
ദേവൻ തറപ്പിൽ 

Thursday, 23 February 2017

പ്രണയം ഒരു തീവ്രവാദം ?

പ്രണയം ഒരു തീവ്രവാദം ?
              ----------
നടുമുറ്റത്തൊരു തുണ്ട് ശിലയിൽ പൊതി-
ഞ്ഞൊരുകൊച്ചു മൺപാത്രമുള്ളിൽ 
കത്തിക്കരിഞ്ഞെന്റെ പൊന്നുമോൾ താരുണ്യം 
കാർമുകിൽ കൈക്കുമ്പിൾ ചാരമായ് 

ആയിരം വെള്ളിടി വെട്ടിയെൻ ഹൃത്തി-
ലാളിപ്പടരുന്നൊരഗ്നി പർവ്വം,
കാലത്തു യാത്ര നീ പറയുന്ന നേരത്ത് 
കരുതിയില്ലല്ലോയി വൻ ദുരന്തം  
എന്തോ പറയുവാൻ ബാക്കിവെച്ചോമലേ 
അക്കഥയിനിയെന്നോടാരു ചൊല്ലിടും 


പുസ്തക കെട്ടുമായ് ആടിപ്പാടി വരും 
പൊന്നുമോളെയിനി നീ വരില്ല 
വെള്ള പുതപ്പിക്കാൻ വെച്ചില്ലൊരൽപ്പവും 
വെണ്മണിക്കളറുള്ള നിൻറെ ദേഹം 
അഗ്നി വിഴുങ്ങുവാൻ ഞാനയച്ചല്ലൊയിന്നു 
അതിമോഹമെന്റെ സ്വപ്നങ്ങളോ?

കടലോളം കനവുകൾ ബാക്കിയാക്കി    
കരളും പറിച്ചിട്ടു യാത്രയായി   
വാർമുടി മാടിവിടർത്തിച്ചിരിയുമായ്
ചാരത്തിനിയാരെത്തുമെന്റെ 
ശിലകൊണ്ടുമൂടിയ മൺപാത്രത്തിൽ 
അവസാനമായൊന്നു ചുംബിച്ചിടാം 

കോരിത്തരിച്ചു ഞാൻ കേട്ടെത്ര കിന്നാരം 
കണ്മണി ചാരത്തു നീ വരുമ്പോൾ 
ചന്ദനം നെറ്റിയിൽ മായുന്ന നേരത്തു  
കൊഞ്ചിക്കുഴഞ്ഞും പുഞ്ചിരിച്ചും 
മുത്തവും തന്നു ഞാൻ മുത്തേ നിനക്കപ്പോൾ 
മുത്തമായ് ചന്ദനം ചാർത്തിയില്ലേ  

നിൻമിഴിക്കോണുകൾ നനയുമ്പോളെന്നും  
കുളിർകോരി ചുംബനം നൽകിയില്ലേ  
നിൻ മിഴിയിണകൾ ഈറനണിയുമ്പോൾ
നിന്നെപ്പുണർന്നതും ഓർമ്മയില്ലേ
പുഞ്ചിതൂകി നീ കന്മഷി പാത്രമായെൻ-
ന്നരികിൽ വരവിനായ് കാത്തിരിക്കാം 

തുള്ളിത്തുളുമ്പും നിലാവെളിച്ചത്തിൽ ഞാൻ 
നിന്റെ വരവിനായി കാത്തിരിക്കാം 
മഞ്ഞുകൾ പെയ്യുന്ന ചന്ദ്രിക രാവിലും 
ചന്ദനക്കുടവുമായ് വന്നുവെങ്കിൽ  
പുഞ്ചിതൂകി നീ പൂനിലാതെന്നലായ്  
ചന്ദ്രികേ,യെന്മുന്നിലണഞ്ഞുവെങ്കിൽ 

ഇരവും പകലും ഞാൻ കാത്തിരുക്കും നിന്റെ  
കാലടിയൊച്ചകൾ കേൾക്കുവാനും 
കനലുപോലെരിയുന്നു നെഞ്ചിപ്പൊളുമെന്റെ   
കരളേ നീയൊന്നു വന്നുവെങ്കിൽ 
കതിരിൽ വിരിയുന്ന മുമ്പേ നീയിപ്പോൾ 
കരളും പറിച്ചിട്ടു യാത്രയായോ? 

പ്രണയനൈരാശ്യത്തിൻ ചുഴികളിൽ  
പൊഴിയുന്നതെത്രയോ യൗവ്വനങ്ങൾ   
നരവീണു മരവിച്ചൊരണു കുടുംബങ്ങളിൽ   
കൊഴിയുന്നതിന്നെത്ര ജീവിതങ്ങൾ 
അഗ്നിക്കൊടുങ്കാറ്റിലുഴലുന്ന പ്രണയത്തിൽ -
നരകമായ് മാറുന്നുവോ നഗരം 
നരകമായ് മാറുന്നുവോ ....
ദേവൻ തറപ്പിൽ 22/02/17 ,


കോട്ടയത്ത് ഗാന്ധിനഗർ സ്‌കൂൾഓഫ് മെഡിക്കൽ എജുക്കേഷനിൽ ഫിസിയോ തെറാപ്പി വിദ്യാർത്ഥിനി ലക്ഷിമിയെ ,പ്രണയാഭ്യർത്ഥന നിരസിച്ചതിന് പൂർവ്വ വിദ്യാര്ഥിയായ ആദർശ് പെട്രോൾ ഒഴിച്ച് കൊലപ്പെടുത്തുകയും സ്വയം അതിൽ ഒടുങ്ങുകയും ചെയ്തതു 01/02/17-നാണു .

പ്രണയം പിടിച്ചുവാങ്ങാമെന്നു ധരിക്കുന്ന ഇന്നത്തെ യുവതലമുറയുടെ ഈ പോക്കിന് ആരാണ് ഉത്തരവാദിയെന്ന് ഓരോ മാതാപിതാക്കളും ഉത്തരം പറയണം .അല്ലാതെ മൗനം ദീക്ഷിച്ചു ഉപവസിക്കലല്ല അതിനുള്ള മറുപടി. . ആണ്കുട്ടിയോ പെൺകുട്ടിയെ പ്രണയാഭ്യർത്ഥന നടത്തിയാൽ അത് തന്റെ ജന്മാവകാശമാണെന്നു തെറ്റിദ്ധരിച്ചു കൊലപ്പെടുത്തുന്ന ഇന്നത്തെ തലമുറയെ ഈവഴിയിൽ വിടുന്നതിന്റെ പൂർണ്ണ ഉത്തരവാദിത്വം  മാതാപിതാക്കളാണെന്നു പറയാതെ തരമില്ല   . 

Saturday, 14 January 2017

ഓടെണ്ടട മണ്ട

ഓടെണ്ടട മണ്ടാ ഓടി പോകല്ലട മണ്ടാ
അമ്മെമറന്നെങ്ങും നീ പോകല്ലെട മണ്ട

കേറണ്ടട മണ്ടാ  തെന്നിപ്പോകൂട മണ്ടാ
മാങ്കൊമ്പിൽ നിന്നെങ്ങാൻ ചാടല്ലെട മണ്ടാ

എഴുന്നേക്കട മണ്ടാ ഇലയിട്ടെടാ മണ്ടാ
ഉശിരുവരാൻ മണ്ടാ ചോറുണ്ണട മണ്ടാ

കഞ്ഞിയൂത്തു മണ്ടാ തൊട്ടുനക്കാൻ മണ്ടാ
മുളകെടുക്കട മണ്ടാ ചമ്മന്തിയുണ്ടട മണ്ടാ

വെശക്കണുണ്ടന്റമ്മേ നിലത്തു തായമ്മേ
എലയും വേണ്ടമ്മേ വയറു കാളുന്നമ്മേ

ഞാറുകുത്തട മണ്ടാ വെള്ളം തേകട മണ്ടാ
കളപറിക്കട മണ്ടാ കതിര് നോക്കട മണ്ടാ

കറ്റമെതിക്കട മണ്ടാ നെല്ലുണക്കട മണ്ടാ
കച്ചിതൂർത്തട മണ്ടാ കാവലിരിക്കട മണ്ടാ

എനിക്ക് വയ്യെന്റമ്മേ ഉറക്കമാണെന്റമ്മേ
ഇനിവിളിക്കല്ലമ്മേ സ്വപ്നം കാണുന്നമ്മേ
ദേവന്‍ തറപ്പില്‍

സാശ്രയങ്ങൾ

സാശ്രയങ്ങൾ ........
പണിത്  മേലാളന്മാർ പരശ്ശതമിന്നു 
നെഞ്ചിൽ സാശ്രയങ്ങൾ  ,മാനവർ -
നെഞ്ചിൽ സാശ്രയങ്ങൾ .....
പകലോൻ പോലും നാണിച്ചിടുന്നോരു 
ചെയ്തികളാണത്രെ , നാട്ടിലു  
പീഡനമാണത്രെ .....
ഗുരുശിഷ്യ ബന്ധങ്ങളറ്റ് പോയിന്നു 
വിൽക്കുന്നുവല്ലൊവിദ്യ , നാട്ടിലും 
കച്ചവടമാണത്രേ .......
ദൈവത്തിന്റെ നാട് അന്ധകാരത്തിൽ 
മദ്യത്തിൽ മുങ്ങിടുന്നേ , നാളെയിൽ  
മുങ്ങുന്ന തോണിയാണെ ,....
ദേവന്‍ തറപ്പില്‍ 

Thursday, 12 January 2017

എമ്മെല്ലെമാർ

എമ്മെല്ലെയായവർ ചുമ്മാതിരിക്കല്ലേ
മണ്ണിൽ പണിതിട്ടു സേവനം ചെയ്

ചുമ്മാതെ കക്ഷത്തിൽ ഡയറിയും തൂക്കി
ഏസീൽ കറങ്ങാതെ വേല ചെയ്യൂ

കാടും പുഴയും നിരത്തി മറിക്കുമ്പോൾ
കണ്ണുമടച്ചിട്ടിരുട്ടാക്കല്ലേ

കെട്ടു താലീം വിറ്റു കള്ളു കുടിപ്പിക്കും
ഷാപ്പുകളൊക്കെയും പൂട്ടിനെടോ

പാതയോരത്തൂടെ പെണ്ണുങ്ങൾക്കൊറ്റയ്ക്ക്
പോകാൻ നിരന്തരം പോരാടടോ
ദേവൻ തറപ്പിൽ . 

Monday, 2 January 2017

ഗുരുദേവന്‍ കാരുണ്യമില്ലെങ്കിൽ

ഗുരുദേവന്‍ കാരുണ്യമില്ലെങ്കിൽ ഭൂമിയില്‍
എന്നെന്നും എല്ലാര്‍ക്കും സങ്കടങ്ങൾ... (2 )
എന്നെന്നും എല്ലാര്‍ക്കും സങ്കടങ്ങൾ....സങ്കടങ്ങൾ..
ഗുരുദേവന്‍ ....

ഇന്നത്തെ കർമ്മങ്ങൾ നാളത്തെ പുണ്യമായ് 
നാടാകെ പടരട്ടെ  ഗുരുനാമങ്ങൾ ..
നാടാകെ പടരട്ടെ  ഗുരുനാമങ്ങൾ...ഗുരുനാമങ്ങൾ...
ഗുരുദേവന്‍ .......
ഇന്നത്തെ നന്മകൾ നാളെയെ വരവേൽക്കാൻ   
മന്നവരിൽ ഉണരട്ടെ നന്മകൾ മാത്രം .എന്നും ,
മന്നവരിൽ ഉണരട്ടെ നന്മകൾ മാത്രം ......(2 )
ഗുരുദേവന്‍ .......

അവശരിൻ കണ്ണുനീർ തുടക്കുവാനായിട്ടു .
എത്തിയതല്ലയോ ദേവ ദേവൻ .....
കരുണാമയനായ ഗുരു സ്വാമിയല്ലയോ
വഴികാട്ടിയായെന്നും നമ്മൾ ദൈവം ......(2 )
ഗുരുദേവന്‍ .......

പാരിൽ നീ പുണ്യമായ് ജന്മം എടുത്തപ്പോൾ
പാവങ്ങൾ ഞങ്ങൾ...ക്കാശ്രയമായ്
പാവങ്ങൾ ഞങ്ങൾ...ക്കാശ്രയമായ് ......

പകലുപോൽ തെളിയുന്നു നിൻ രൂപം ഞങ്ങളിൽ
പകലോനായ് എത്തണേ ഗുരുദേവനേ ,നാഥ
പകലോനായ് എത്തണേ ഗുരു ദേവനേ .....(2 )
ഗുരുദേവന്‍ .......
ദേവൻ തറപ്പിൽ ..

Monday, 26 December 2016

നടന്നു നടന്നു നടന്നു ചെല്ലാൻ പാരഡി

നടന്നു നടന്നു നടന്നു ചെല്ലാൻ....!!
നടന്നു നടന്നു നടന്നു ചെല്ലാൻ പറ്റാത്തൊരു ഗ്രാമത്തിൽ ...
കൂരയൊന്നു കൂട്ടാനായ് ഞാൻ കൊതിക്കുന്നല്ലൊ..
ഇന്നും ..കൊതിക്കുന്നല്ലോ ...(2)
നടന്നു നടന്നു .......
കിലു കിലുങ്ങനെയമ്പലത്തിൽ മണി കിലുക്കം കേട്ടു രാവിൽ
വെളു വെളുപ്പിനെ കൃഷികൾ നോക്കാൻ  ഉണർന്ന കാലം ..
പണ്ടു ...ഉണർന്ന കാലം (2)
നടന്നു നടന്നു ...........
ഹൃദയമെന്റ മിഴികൾ നനച്ചു ഞാനത്തിന്റെ ഓർമ്മയിൽ മുങ്ങി
പമ്പരങ്ങളുരുട്ടിയ ബാല്യം... നൊമ്പരത്തിൻ പൂക്കളായ് ...
ഇന്നും നൊമ്പരത്തിൻ പൂക്കളായ് .....
നടന്നു നടന്നു ...........
പണ്ടു പണ്ടു കുഞ്ഞും നാളിൽ സ്വപ്നമൊക്കെ വീണുടഞ്ഞു 
ഞാനതിന്റെ ചൂടിൽ ഉരുകി പ്രവാസിയായി ,
ഇന്നും ...പ്രവാസിയായീ .............
നടന്നു നടന്നു ..............
മധുരിക്കും ഓർമ്മകൾ നിറയും പൂത്തൊരവന്റെ നാടും വീടും 
എൻറെ ബാല്യം പൂത്തുലഞ്ഞ ഗ്രാമമെവിടെപ്പോയ് 
ഇന്നു ...ഗ്രാമെവിടെ പോയി  .........
നടന്നു നടന്നു ...............
മരണത്തെ പുൽകും നേരം....  ഒരു പിടിയും മണ്ണില്ലല്ലൊ 
ഹൃദയത്തിൽ കടലുമിരമ്പി തിരയുയരുന്നേ ..
കരളിൽ തിരയിളകുന്നേ .....
നടന്നു നടന്നു നടന്നു ചെല്ലാൻ ..
ദേവൻ തറപ്പിൽ 26/12/16

Tuesday, 20 December 2016

കണ്ണും ചിമ്മി പെണ്ണു കിണുങ്ങണ്

തിന്തിനം തിന്തിനം തന്നാരെ തന
താന്തിനം താന്തിനം താനാരേ .....
കണ്ണും ചിമ്മി പെണ്ണു കിണുങ്ങണ്
കൊഞ്ചി കൊണ്ടെന്തോ പറയണ് ...
അല്ലിമലർക്കാവിൽ ഉത്സവ നാളില്
ചെല്ലക്കിളി മുങ്ങി കുളിക്കണ്  ..(2)
കണ്ണും ചിമ്മി പെണ്ണു .....
മാനം കറുത്തപ്പം  നേരം ഇരുട്ടണു
കൂരേല്‍ പെണ്ണു തനിച്ചാണേ ...
വെള്ളിടി വെട്ടി മയ ചൊരിയുമ്പള്
നെഞ്ചു കലങ്ങണു പുന്നാരേ , എന്റെ
നെഞ്ചു കലങ്ങണു പുന്നാരേ , ....
കണ്ണും ചിമ്മി പെണ്ണു .....
ചക്രം ചവുട്ടി ഞാൻ പാടം നനച്ചപ്പോ
ചാരത്തു വന്നില്ലെ പുന്നാരേ ..
കായലില്‍ വള്ളം തുഴയുന്ന നേരത്ത്
കടക്കണ്ണിട്ടു നീ നോക്കീല്ല .....
കണ്ണും ചിമ്മി പെണ്ണു .....
കയറ്റ മെതിക്കണ നേരത്തും  പെണ്ണു  .
നെല്ലും കതിരും വേർ തിരിക്കണ്
കൂലിക്കു കിട്ടിയ നെല്ലുമായ്  പോകുമ്പം
പാടവരമ്പത്ത് വീഴല്ലേ ,പെണ്ണേ ,
തെന്നി വരമ്പത്ത് വീഴല്ലേ .....
കണ്ണും ചിമ്മി പെണ്ണു .....
വെളുത്ത പെണ്ണേ നിന്റടുത്തു നിന്നപ്പം
കൊതിച്ചു പോയടി പുന്നാരേ ,നിന്നേ
കൊതിച്ചു പോയടി പുന്നാരേ......
 ( ദേവൻ തറപ്പിൽ ) ......

Friday, 16 December 2016

സിന്ദൂര പൊട്ടുള്ള പൊന്നേ നീ നാടൻ പാട്ടു

സിന്ദൂര പൊട്ടുമിട്ടു പെണ്ണേ നീ   
ചമ്രം ഇരുന്നപ്പോൾ 
ചന്ദത്തിലാണല്ലോ പുന്നാരേ 
ചന്ദന തേൻകുടമേ  .....

ആളൊഴിയും വരെയും പുന്നാരേ ...
ആരും കാണാതെ ഞാനും ...
ആട്ടവും പാട്ടും  തീരാൻ പുന്നാരേ ... 
കാത്തിരുന്നല്ലോ ഞാനും .....

ആദ്യമായന്നു നീയും പുന്നാരേ ..

മാവിൻ ചുവട്ടിൽ നിന്നു ...
ആളുപോകും വരെയും പുന്നാരേ  ..
കാത്തിരുന്നല്ലോ നീയും  ......

മുട്ടിയുരുമി നീയും പുന്നാരേ  ...

മുത്തവും തന്നുവല്ലോ .. ...
മുത്തമിട്ട കവിളിൽ പുന്നാരേ  
മുത്തുകള്‍ പൂത്തുവല്ലോ ...

ചുറ്റുപാടും നോക്കി പുന്നാരേ  ....

പൂനിലാവുള്ള രാവിൽ  ....
പുഞ്ചിരി പൂകികൊണ്ട് പുന്നാരേ ....
മുത്തവും തന്നു ഞാനും  ....

കള്ളച്ചിരിയുമായി പുന്നാരേ 

കള്ളിയെ പോൽ മറഞ്ഞു ....
കല്‍ബിന്‍റെ താളമപ്പോൾ പുന്നാരേ ,
കൽക്കണ്ടം പോലെയെന്റെ......!!
( ദേവൻ തറപ്പിൽ )

Thursday, 15 December 2016

കൊച്ചു പെണ്ണിന്റച്ഛനൊരു നാടൻ പാട്ടു

കൊച്ചു പെണ്ണിന്റച്ഛനൊരു
ചേല വാങ്ങാൻ പോയി
കൊച്ചു തോണിക്കേറിയപ്പം
തോണി മുങ്ങിപ്പോയി

കായലിലും തോണി മുങ്ങി
കാശ് മുഴുവൻ പോയി
മീൻ പിടിക്കാൻ വന്നവരു
മുങ്ങു തപ്പി നോക്കി ....

കാശും പോയി ചേലേം പോയി
കടുക്കനൊക്കേം പോയി
കടലിരമ്പി കരളിലപ്പോൾ
കരളും കൊണ്ട് പോയി

വീട്ടിൽ വന്നു കേറിയപ്പോൾ
മൂക്ക് പിഴിയണ് പെണ്ണു ...
ഉള്ള കാര്യം ചൊല്ലിയപ്പോൾ
പെണ്ണിൻറുള്ളു കാളി ...

ചേല വേണ്ട ചേലും വേണ്ട
ചേലു മതിയെന്റച്ഛൻ ......
ചേലായിനീം വാങ്ങാമല്ലോ
ചേലിൽ വേണം അച്ഛൻ ...



ഗുരുദേവ ചരിതം വഞ്ചിപ്പാട്ട്

ഗുരുദേവ ചരിതം
ഓ തിത്തിത്താരാ തിത്തിത്തെയ്  
തിത്തെയ് തക തെയ്തെയ്തോം
ഗുരുദേവ ദര്‍ശനത്തിന്‍
മഹത്യങ്ങളറിയുവാന്‍
ചരിത്രവും ദർശനമറിഞ്ഞീടണം

ജാതിഭേദവിദ്വേഷത്തിൽ
ആയിത്വത്തിൻ തീജ്വലയിൽ
വെന്തുരുകും ജനത്തിൻറെ മനം കവർന്നു

അന്ധവിശ്വാങ്ങളൊക്കെ
മാറ്റിനിർത്തി ഗുരുവരർ
സമൂഹത്തെ ഉയർത്തുവാൻ പ്രയത്നിച്ചില്ലേ

മലയാള നാട്ടില്‍ പണ്ട്
മനുഷ്യത്വഹീനന്മാരാം
അധ;മന്മാർ കേരനാട്‌ ഭരിക്കും കാലം

തീണ്ടലിന്റെ പേരും ചൊല്ലി
തീണ്ടാപ്പാടു ദൂരെ നിർത്തി
അവർണ്ണരായ് മുദ്രകുത്തിയകറ്റിയപ്പോൾ

ചെറുമക്കൾ ചണ്ടാലരേം
ചിത്രവധം ചെയ്തു കൊന്നു
പാരതന്ത്ര പാതയിലും തളച്ച നാളിൽ

അറിവില്ലാ ജനത്തിനേ
അടിമകളാക്കിയവർ
അധികാര തിമിരത്തിൽ ഭരിക്കും കാലം

വിദ്യാഭ്യാസം കൊടുക്കാതെ
ആരാധനേം നിഷേധിച്ചു
അശരണ വർഗ്ഗത്തെയും അടിമയാക്കി

അടിമയെ നുകത്തിങ്കൽ
കെട്ടിപ്പൂട്ടി വയലുകൾ
ഉഴുതല്ലോ സവർണ്ണന്മാർ കലപ്പയിലും

ചെമ്പഴന്തി ഗ്രാമത്തിങ്കൽ
ചെമ്പകപ്പൂ നിറത്തിലും
പൊൻചതയ നാളിൽ ദേവൻ ഭൂജാതനായി

ജനിച്ച സമയം തൊട്ടേ
പൊക്കിൾ കൊടിമുറിച്ചിട്ടും
വിശപ്പിലും ദാഹത്തിലും കേണില്ലപോലും

ഇരുട്ടിലായി കിടന്നൊരു
ജനതയ്ക്ക് മോക്ഷമേകാൻ
പിറന്നു പൊൻ താരമായി കേരളക്കാരേൽ

അവശന്മാർക്കഭയമായ്
ആവശതമാറ്റിടുവാൻ
സ്നേഹദൂതിൻ മന്ത്രവുമായ് ഗുരുവരരും

കാലികളെ മേയ്ച്ചീടുന്ന
സമയത്തും ഗുരുദേവർ
സ്ത്രോത്രമെല്ലാം ഉരുവിട്ടു ഹൃദിസ്ഥമാക്കി

ഒരു നാളിൽ മുത്തശ്ശിടെ
വേർപാടിലും ഉല്ലാസങ്ങൾ
കണ്ടദേവൻ ഖിന്നനായി മറഞ്ഞിരുന്നു

കാലമേറെ കഴിഞ്ഞപ്പോൾ
സകലതും വിട്ടെറിഞ്ഞു
തപസ്സിലും ജ്ഞാനംനേടി തമ്പുരാൻവന്നു

പുലിപ്പാറ കൊടിതൂക്കി
ഭയനാക ഗുഹയ്ക്കുള്ളിൽ
ധ്യാനലീനനായെത്രയോ സംവത്സരങ്ങൾ

പുലിയോടും പാമ്പിനോടും
സഹവാസം കൂടിദേവൻ
തപസ്സനുഷ്ഠിച്ചല്ലോ മരുത്വമലേൽ

തപസ്സോടെ ജ്ഞാനോദയം
ലഭിച്ചപ്പോൾ നാണുവാശാൻ
നാരായണഗുരുവായി ലോകമറിഞ്ഞു

ഭദ്രകാളി മറുതയെം
ആരാധിക്കും ജനത്തിനു
ഈശ്വരനെ പ്രതിഷ്ഠിപ്പാനായുറച്ച ദേവൻ

ശിവരാത്രി നാളിലൊന്ന്
മുങ്ങിപ്പൊങ്ങി നെയ്യാറിൽ
പൊങ്ങിയല്ലോ ശിവലിംഗ പ്രതിഷ്ഠയായ്

ഓം നമശ്ശിവായ മന്ത്രം
ലക്ഷം കണ്ഠം മുഴങ്ങിപ്പോൾ
ലക്ഷണങ്ങൾ നോക്കാതെയും പ്രതിഷ്ഠിച്ചന്ന്

പ്രതിഷ്ഠയാം വേളയിലും
നക്ഷത്രങ്ങൾ നിരയായി
ആകാശത്തു ശോഭകാന്തിവലയം കാണ്ടു

ഇരുട്ടിലായ്ക്കിടന്നൊരു
ഭാരതത്തെ ഗുരുവരർ
പുതുപ്രകാശവും നൽകി തിരികൊളുത്തി

ജാതിഭേദം മതദ്വേഷം
ഏതുമില്ലാതെ സർവ്വരും
സോദരത്വേനവാഴുന്നൊരു മാതൃകാസ്ഥാനം

സന്ദേശങ്ങൾ എഴുതി
നിർദേശവും നല്കിദേവൻ
സകലർക്കും വന്ദിച്ചിടാം ജാതിനോക്കാതെ

പ്രതിഷ്ഠയ്ക്ക് സാക്ഷിയായി
അധഃകൃത നവോത്ഥാനൻ
അയ്യങ്കാളി ദൂരെനിന്നും കൺനിറച്ചല്ലോ

ഈഴവന് ശിവലിംഗം
പ്രതിഷ്ഠിപ്പാനേത് ശാസ്ത്രം
വിധിച്ചെന്നു ആഢ്യന്മാരും ചോദിച്ചനേരം

പ്രതിഷ്ഠ നാം നടത്തീല്ലോ
ഈഴവന്റെ ശിവനാണ്
അയിത്തമില്ലാതെയാർക്കും വന്ദിച്ചിടുവാൻ

മറുത്തൊന്നും പറയാതെ
ഈഴവന്റെ ശിവനല്ലോ-
ന്നോർത്തു പാവം ബ്രാഹ്മണനും ഉത്തരം മുട്ടി

തൃപ്പാദത്തിൻ വാചാർത്ഥത്തിൻ
ലക്ഷ്യാർത്ഥങ്ങൾ കാണാത്തൊരു
ബ്രാഹ്മണന്റെ നിലയിലേക്കായി നമ്മളും

അന്ധകാരം നിറഞ്ഞതാം
കേര നാടിൻ ജനത്തിന -
ന്നാദ്യമായി സ്വാതന്ത്ര്യത്തിനമൃതേത്തായി

സംഘടനകൊണ്ട് ജനം
ശക്തരാകാനരുളിയ
തമ്പുരാനാം ഗുരുവരർ സന്ദേശം നൽകി

അധഃസ്ഥിത ജനത്തിന്
വിദ്യാനൽകനായിട്ടെങ്ങും
നിശാപാഠശാല സ്ഥാപിച്ചല്ലോ ഗുരുവരരും

താലികെട്ടും പുളികുടിം
ജന്തുബലി മുതലായ
അനാചാരം നാട്ടിലെങ്ങും നടക്കും കാലം

മുരടിച്ച ജനത്തിന്റെ
മുൾക്കിരീടം അഴിക്കാനായ്
തുറന്നിട്ട് വെളിച്ചത്തിൻ ജാലകങ്ങളും

നീതിക്കായി പോരാടുവാൻ
വിദ്യയേകി ജനത്തിന്റെ
നവോത്ഥാന വിളക്കല്ലോ തൃപ്പാദങ്ങളും

അദ്വൈതിയാം തൃപ്പാദങ്ങള്‍
വിഗ്രഹങ്ങള്‍ സ്ഥാപിച്ചപ്പോള്‍
രോഷത്തിലും വാദിക്കുവാൻ എത്തിവാഗ്ഭടന്‍

പടുകുഴീല്‍ കിടക്കുന്ന
ജനത്തിനെയുണര്‍ത്തുവാന്‍
ദൈവവിശ്വാസം ആണു എളുപ്പവഴി

നമുക്കല്ല ജനത്തിനെ -
ന്നരുളിയ നേരത്തിങ്കൽ
മറുത്തൊന്നും പറയാതെ വാഗ്ഭടാനന്ദൻ

സംവാദവും മതിയാക്കി
ഗുരുവിനെ വന്ദിച്ചിട്ടു
സുകൃതമായ മനസ്സുമായി ഇറങ്ങിയാല്ലോ

വവ്വാലിൻറെ നാറ്റമുള്ള
ഇരുട്ടുള്ള ക്ഷേത്രങ്ങളിൽ
പൂജയല്ല വിദ്യാവേണോന്നരുളി ദേവൻ

പൂന്തോട്ടങ്ങൾ പിടിപ്പിച്ച്
വൃത്തിയായ് സൂക്ഷിക്കുമ്പോ -
നല്ലകാറ്റും വെളിച്ചവും തനിയെ വരും

മതം ഭാഷ വേഷമൊന്നും
ദോഷമില്ല വിവാഹത്തിൻ
മിശ്രഭോജനം നടത്താം ജാതിനോക്കാതെ

പല മതസാരങ്ങളും
വെളിപ്പെടുത്തൊന്നല്ലോ
മതങ്ങളും ജനം തമ്മിൽ കലഹം വേണ്ട

ശിഷ്യന്മാർകൾ പുതുമതം
സ്ഥാപിക്കുവാൻ തുനിഞ്ഞപ്പോൾ
നമുക്കെല്ലാ മതങ്ങളും സമ്മതമാണ് !

മാവിന്റില തൊട്ട് ഗാന്ധി
ജാതിക്കായ് വാദിച്ചപ്പോൾ
ഇലകളിൽ രസമൊന്നെ ഉള്ളൊന്നു ദേവൻ

ചാതുർ വർണ്ണ്യം മനുഷ്യരിൽ
ഇല്ലായെന്നും തെളിവോടെ
ഖണ്ഡിച്ചപ്പോൾ ഗാന്ധിജിയും സന്തോഷിച്ചല്ലോ

ദീർഘയാത്ര കഴിഞ്ഞനാൾ
ആശ്രമത്തിലിരിക്കുമ്പോൾ
കുഞ്ഞുമാമി വൈദ്യരോടും അരുളിദേവൻ

ഇലവിൻ പൂ പാകമാകാൻ
കാത്തിരുന്ന കിളിയെപ്പോൾ
വൃഥാവിലായ് സംഘടന പ്രവർത്തനങ്ങൾ

ഭംഗിയുള്ള പഴവർഗ്ഗം
പാകമാകാൻ കാത്തിരുന്ന
കിളികളും ഞെട്ടിപ്പോയി പഞ്ഞികണ്ടപ്പോൾ

വാദിക്കാനായ് വാദം വേണ്ട
തത്വപ്രകാശത്തിന്നാകാം
മാനവരിൽ മദം പൊട്ടി ഭിന്നരക്കല്ലേ

സർവ്വമത സമ്മേളനം
ഭാരതത്തിലാദ്യമായ്
ആലുവയിൽ നടത്തിതു തൃപ്പാദമല്ലോ

ജാതിയില്ലെന്നറിയിക്കാൻ
സർവ്വമത കവാടത്തിൽ
പുതിയൊരു സന്ദശവും എഴുതിനൽകി

വാദിക്കാനും ജയിക്കാനും
അല്ലല്ലൊയി സമ്മേളനം
അറിയാനും സർവ്വരേയും അറിയിക്കാനും

വിദ്യകൊണ്ട് സ്വാതന്ത്ര്യവും
സംഘടിച്ചു ശക്തരാകാൻ
സംഘടന രൂപം നൽകി ഗുരുവരരും

അടരാടി ഗുരുസ്വാമി
അടിമുടിമാറ്റത്തിന്
ആയുധമൊ ആക്രമത്തിൻ പാതയല്ലാതെ

കാവിമുണ്ടും കമണ്ഡലോം
ധരിക്കാതെ തൃപ്പാദങ്ങൾ
സമൂഹത്തിലിറങ്ങി ജനനീതിക്കായിട്ടു

സ്വാതന്ത്ര്യത്തിൻ വിളികേട്ടി -
ട്ടുണർന്നൊരു ജനതയ്ക്ക്
പ്രകാശത്തിൻ തിരിനാളം തെളിയിച്ചല്ലോ

അമ്പലങ്ങളേറിയപ്പോൾ
തമ്പുരാനാം ഗുരുസ്വാമി
വ്യവസായം തുടങ്ങുവാനാജ്ഞയും നൽകി

മദ്യം മഹാവിഷമാണ്
ഉണ്ടാക്കല്ലേ കൊടുക്കല്ലേ
കുടിക്കല്ലെന്നുണർത്ഥിച്ച മഹാഋഷിയും

കള്ളുചെത്തും കത്തിരണ്ടായ്
മുറിച്ചു ക്ഷൗരം ചെയ്യാൻ
അരുളിയ മഹാനല്ലോ സ്വാമിതൃപ്പാദം

ഇന്ന് ഗുരു സന്ദേശങ്ങൾ
പത്തായത്തിൽ പൂട്ടിവച്ച്
പരമത സംഘർഷങ്ങൾ വളർത്തിടുന്നു

ഗുരുദേവ ദർശനങ്ങൾ
അറിയാത്ത നേതൃത്വവും
നിലയില്ലാ കടലിലായ് ജനസമുദ്രം

ഗുരുദേവ ദർശനങ്ങൾ
സമൂഹത്തിൽ പരത്തുവാൻ
ഹൃദിസ്ഥവും പരിഞ്ജാനോം നേടിടേണ
ദേവൻ തറപ്പിൽ 

ഓട്ടൻതുള്ളൽ /കുട്ടൻ നായരിൻ വാക്കിൻ ശൌര്യം

കുട്ടൻ നായരിൻ വാക്കിൻ ശൌര്യം 
പണ്ടേപ്പോലെ ഫലിക്കുന്നില്ലാ ,
പണ്ടീ നായരിൻ പേരും പെരുമേം    
കണ്ടിട്ടുള്ളൊവരാണേ ഗ്രാമം ..

തോമ്മാ കള്ളുകുടിച്ചു വരുമ്പോൾ 
തോന്നും നായരെ കണ്ടാൽ പേടി 
കൂട്ടം കൂടും തെമ്മാടികളും 
വീട്ടിലു വന്നു ക്യൂവിൽ നിൽക്കും 

വീട്ടിൽ വരുന്നൊരു തെമ്മാടികളെ  
സൂക്ഷിച്ചിട്ടു നോക്ക്യാൽ നായർ  
മുട്ടുമിടിച്ചു മൂത്രമൊഴിക്കും 
തെമ്മാടികളും തൊമ്മന്മാരും 

കൈവിരലൊന്നു ഞൊടിച്ചു വിളിച്ചാൽ 
കൈയ്യകലത്തിൽ വന്നവർ നിൽക്കും 
തെമ്മാടികളെ വിളിച്ചു നിരത്തി 
തൊമ്മനെ ചൂണ്ടിപ്പറയും നായർ 

ചാവടിയിൽ പൊയ് വയറുനിറച്ചു 
കപ്പേം കഞ്ഞീം പൂശടമോനേ 
തിന്നു കഴിഞ്ഞാൽ പാടത്തിൽപ്പോയ് 
കന്നിനെ പൂട്ടട വേഗം വേഗം 

പൊണ്ണൻ വാഴകണക്കെ തടിച്ചു  
മുഴുത്തു കൊഴുത്തിട്ടെന്തട കാര്യം 
ചുമ്മനടക്കും പൊണ്ണൻമാർക്കോ 
ഉണ്ണാനിവിടെ ചോറുമതില്ലേ ?

എല്ലും തേഞ്ഞു പണിയത് ചെയ്‌താൽ 
പല്ലും മുറിയെ പന്നി വിളമ്പാം 
കട്ടപ്പല്ലുകൾ കൊണ്ട് കടിച്ചുവലിച്ചു 
കറുമുറകറുമുറ കടിച്ചുവിഴുങ്ങ് 

കറ്റമെതിയ്ക്ക് വിളിക്കും നേരം 
കൂർക്കം വലിയിൽ പെട്ടാലപ്പോൾ 
ചൂരലുമായിട്ടവിടെ വരും ഞാൻ 
ചൂരൽ പാടുകൾ വീഴും നെഞ്ചിൽ 
( ദേവൻ തറപ്പിൽ )

Wednesday, 14 December 2016

പുതു വര്‍ഷ

പുതു വര്‍ഷ ആശംസകള്‍ (2017)
====================



ഒരു പാടു നൊമ്പരം തീര്‍ത്താണീവര്‍ഷം ,
ഒടുവില്‍ നീ പോകുമ്പോള്‍ ചുംബനങ്ങള്‍ "


ഒരുപാടുസ്വപ്നമായ് എതിരേറ്റിടാം   
ഒരുപാടു സ്വപ്‌നങ്ങള്‍ തന്നീടേണം ?


ആശംസ നേരുന്നു ആയിരമായിരം 
ആഘോഷമാകട്ടേ "ജീവിതത്തില്‍ "

എന്നെന്നും പുതുവര്‍ഷമാകട്ടെ ജീവിതം 
എന്നെന്നും പുതുജീവൻ നല്കിടട്ടേ 

പെണ്ണായ്പ്പിറന്നാൽ !!!


പെണ്ണായ്പ്പിറന്നാൽ !!!
--------------------------------
ആദ്യത്തെ കണ്മണി പെണ്ണായിരിക്കണം ,
പെണ്‍ഭ്രൂണഹത്യ കുറക്കണം ,നാട്ടിൽ ,
പെണ്‍കുഞ്ഞിൻ ഹത്യാകുറയ്ക്കണം !!!

പെണ്ണായ്പ്പിന്നെന്നാൽ പൊന്നായിടുമെന്നു ,
പണ്ടുള്ളോർ ചൊല്ലീതാണേ ,പണ്ടെങ്ങോ ,
പണ്ടുള്ളോർ ചൊല്ലീതാണേ !!!

പെണ്ണായ് പിറന്നെന്നാൽ കണ്ണീരായ് തീരുന്ന ,
ചൊല്ലെല്ലാം പൊള്ളയാണേ ,ഇന്നെല്ലാം  ,
ചോല്ലെല്ലാം പൊള്ളയാണേ  !!!

സ്വാശ്രയങ്ങൾ നേടി ശാക്തികരിച്ചല്ലോ ,
ശക്തിയും നേടിയല്ലോ ,സ്ത്രീകളും ,
സമ്പത്തും നേടിയല്ലോ !!!

കാലങ്ങൾ മാറിപ്പോൾ കാര്യ മറിഞ്ഞതും ,
കാതലിൽ  മാറ്റമുണ്ടായ് ,കലികാല ,
കാതലിൽ മാറ്റമുണ്ടായ് !!!

ഭ്രരണസിരകളിൽ സ്പോർട്ട്സ്സ് രംഗങ്ങളിൽ ,
ഭാമിനി ദേവിയായീ  ,ഭാരത നാരി ,
ഭാമിനി ദേവിയായീ !!!

കാലത്തെ തോൽപ്പിച്ചു കാവ്യം രചിക്കുവാൻ ,
കാത്തിരിക്കുന്നോരാണേ ,നാരികൾ ,
കാത്തിരിക്കുന്നോരാണേ !!!

ദേവൻ തറപ്പിൽ!!!
===============